Keppast um að komast í hóp Controlant, Meniga og Pay Analytics

Gulleggið er stærsta og elsta frumkvöðlakeppni landsins og er haldin á vegum Icelandic Startups. Fram kemur í tilkynningu að rýnihópur fagaðila hafi farið vandlega yfir kynningar hvers teymis sem stóðust kröfur Gulleggsins og eftir standi þau tíu stigahæstu.

Hægt verður að fylgjast með viðburðinum sem hefst klukkan 16 í beinni útsendingu á Vísi og Stöð 2 Vísi.

Eftirfarandi teymi taka þátt í lokakeppni Gulleggsins 2022 sem fram fer í Grósku í dag:

SEIFER

„SEIFER vinnur að því að hanna og þróa íþróttabúnað, ásamt gagnagrunni, sem er nýttur í rauntíma mælingar og gagnasöfnun varðandi höfuðhögg. Með gagnasöfnun búnaðarins er hægt að endurbæta bataferli og viðbragðáætlanir gegn heilahristingum í íþróttum.“

Samtaka heimili

„Smáforrit hannað fyrir foreldra þeirra barna sem eiga tvö heimili. Markmiðið er að hanna tæki sem auðveldar daglegt skipulag foreldrasamvinnu, lágmarkar þætti sem stuðla að neikvæðum samskiptum og dregur úr álaginu sem fylgir þriðju vaktinni fyrir samsettar fjölskyldur.“

Ecosophy

„Við hjálpum fólkið að taka góðar ákvarðanir um viðbrögð við loftslagsbreytingum.“

Guru

„Hugbúnaður og markaðstorg sem gerir hverjum sem er kleift að setja saman skipulagðar ferðir og gerast leiðsögumaður.“

Miako

„Markaðstorg sem stuðlar að bættu hringrásarhagkerfi ásamt því að hvetja almenning og fyrirtæki til að láta gott af sér leiða.“

Gamechanger

„Hugbúnaðarlausn sem hjálpar einstaklingum að bæta sig í mismunandi íþróttum í eigin frítíma. Lausnin býr til sérsniðnar leiðir sem gerir einstaklingum kleift að ná sem mestum framförum.“

TVÍK

„TVÍK, eða tæknivæddi íslenskukennarinn, er gagnvirkur kennsluvettvangur sem styðst við nýjustu máltækniaðferðir til að hjálpa þeim sem eru að stíga sín fyrstu skref í að læra íslensku.“

Vetur Production

„Íslenskt animation fyrirtæki sem framleiðir teiknimyndir upp úr þjóðsögum okkar og ævintýrum. Áhersla er lögð á fjölbreytileika og varðbeita íslenskan menningararf.“

Stöff

„Rafrænt deilihagkerfi sem býður notendum að leigja eða lána út stöff í sinni eigu til annarra notenda á öruggan hátt og þar með draga úr sóun og styrkja hringrásarhagkerfið.“

Lilja app

„Bjargráður þolenda til bættrar lagalegrar og félagslegrar stöðu.“