Næringargildi reiknuð út í rauntíma á Preppbarnum

Preppbarinn er „Take away“ veitingastaður þar sem viðskiptavinir sjá næringargildi máltíðar reiknast út í rauntíma meðan máltíðin er búin til fyrir framan þá og geta hlaðið gildunum inn í heilsutengd smáforrit.

„Á Preppbarnum muntu geta sett saman þína eigin máltíð, salat eða vefju úr úrvali af hráefni sem við bjóðum upp á og valið um að fá matinn hitaðan eða ekki. Við eru með skjá í glerborðinu fyrir framan viðskiptavini og um leið og við bætum hráefni við réttinn nemur vigtin það og næringargildið kemur fram á skjánum í samræmi við þau grömm sem bætt er við. Viðskiptavinir geta því fylgst með hvernig næringargildi máltíðarinnar breytist eftir því hvernig hún er samsett,“ útskýrir Guðmundur.

Hann segir Preppbarinn koma til móts við stóran og stöðugt stækkandi hóp fólks sem hugsar um heilsuna og vill vita nákvæmlega hvað það lætur ofan í sig.

„Hugmyndin er fyrst og fremst að auðvelda fólki á hraðferð að fá góðan, hollan og næringarríkan mat á sem stystum tíma en einnig að geta gefið nákvæm næringargildi fyrir þá sem kjósa að fylgjast með því. Næringargildi máltíða á Preppbarnum eru prentuð út á límmiða sem fer á boxið og fólk getur þá til dæmis "quick addað" næringargildunum í myfitnesspal.

Á veitingastöðum eru oft tiltekin stöðluð næringargildi fyrir ákveðnar máltíðir en það getur verið misjafnt eftir því hvernig máltíðin er löguð, hvort kokkurinn setji stundum kúfulla matskeið eða sléttfulla af ákveðnu hráefni til dæmis en hjá okkur sést þetta alltaf alveg nákvæmt. Við létum sérútbúa fyrir okkur kerfi sem talar við vogirnar og reiknar út næringargildin. Sjón er sögu ríkari,“ segir Guðmundur.

Preppbarinn verður opnaður klukkan 11 í dag,  Suðurlandsbraut 10.