Þórdís fer fram gegn nöfnu sinni

Í tilkynningu um framboð sitt segist Þórdís Sigurðardóttir hafa, sem stjórnandi og ráðgjafi, öðlast mikla reynslu af farsælum umbreytingarverkefnum. Leiddi hún meðal annars verkefni sem varð til þess að Hjallastefnan, þar sem Þórdís var framkvæmdastjóri, fékk verðlaun fyrir „Byltingu í stjórnun“ frá Viðskiptaráði Íslands.

„Sá árangur sem ég hef náð í fyrri störfum byggist á því að auka völd og áhrif starfsfólksins sem raunverulega vinnur verkefnin. Árangurinn af þessari nálgun er aukin starfsánægja, færri veikindadagar og betri rekstrarárangur. Ég vil að svipaðar leiðir séu notaðar í auknum mæli í rekstri og stjórn borgarinnar með því markmiði að bæta þjónustu og auka virðingu við alla borgarbúa.

Til að bæta velferð og þjónustu í borginni er einnig mikilvægt að bregðast við ákalli atvinnulífsins um að stytta boðleiðir og einfalda ferla með raunverulegum hætti.Starfsemi atvinnulífsins í borginni er einn lykilþátta við að mynda sjálfbær og lífleg hverfi. Innviðir verða styðja við þá uppbyggingu.

Ég hef einlægan áhuga á hugmyndum sem varða hagsmuni borgarbúa og vil að hlustað sé á raddir íbúa hverfa með markvissari hætti. Með því tel ég að hægt sé að finna fjölbreyttar lausnir og valkosti þegar kemur að mikilvægustu þáttum nærþjónustunnar og varða borgarbúa mestu máli,“ segir Þórdís.