Setur í forgang að hugsa vel um húðina: „Ég er ekkert að flýta mér“

Sylvía Rut Sigfúsdóttir skrifar 25. febrúar 2022 07:01

Linda Ben er gestur í nýjasta þættinum af Snyrtiborðinu. Þættirnir eru framleiddir af Undireins fyrir Vísi en Heiður Ósk og Ingunn Sig sjá um þáttastjórn. Undireins

Góð húðrútína er gulls í gildi. Matgæðingurinn Linda Ben gerir sig alltaf til á morgnanna til þess að setja tóninn fyrir daginn og hún passar vel upp á húðumhirðuna, sérstaklega fyrir svefninn.

„Ég byrja alltaf á því að hreinsa húðina. Ég tek „make-upið“ af og nota Michellar vatn í það,“ segir Linda um kvöldrútínuna sína. Hún setur á sig brúnkuvatn og notar þá hendurnar.

„Ég reyni að nota eins lítinn bómull og ég get.“

Hún byrjar snemma að huga að því að þrífa andlitið eftir daginn og dekra við húðina með góðum vörum. Ferlið byrjar oft samhliða því að hún gerir börnin sín tvö tilbúin fyrir svefninn.

„Ég tek minn tíma í þetta. Ég er ekkert að flýta mér þegar ég er að græja mig fyrir nóttina.“

Linda segir að hún byrji oft á meðan börnin eru í baði á sama baðherberginu.

„Þá set ég á mig eitt andlitsvatn og svo set ég þau í náttföt og þá set ég á mig annað andlitsvatn.“

Linda Ben fór yfir sína rútínu og uppáhalds förðunar- og snyrtivörur í nýjasta þættinum af Snyrtiborðinu. Þáttinn má sjá í spilaranum neðst í fréttinni.

Linda starfar á samfélagsmiðlum og er einstaklega klár í eldhúsinu. Hún hefur meðal annars gefið út matreiðslubókina Kökur. Hún sýnir sínar uppáhalds snyrtivörur í þættinum.Undireins/Birgitta Stefánsdóttir

Nuddaði burt hnútana

Að gefa húðrútínunni góðan tíma tryggir að vörurnar ná að komast vel inn í húðina áður en sú næsta er sett á andlitið. Þetta er líka einstaklega sniðugt hjá Lindu því með þessu tryggir hún að húðvörurnar séu ekki nýlega komnar á andlitið þegar hún leggst á koddann að sofa á kvöldin. Það gæti valdið því að húðvörurnar færu í koddaverið í stað þess að gefa andlitinu raka.

Þegar Linda ætlar að gera extra vel við sig notar hún andlitsmaska eða andlitsnuddtæki og svo byrjaði hún nýlega að nota Gua Sha.

„Þegar ég byrjaði að nota þetta þá fann ég fyrir hnútum í kjálkanum á mér sem ég náði bara að nudda úr. Þeir hafa ekkert komið aftur svo ég held að þetta sé komið til að vera.

Í þættinum er smá innlit á fallegt heimili Lindu í Mosfellsbænum, förðunarráðið er á sínum stað og svo sýnir Linda Ben ótrúlega takta í augnháraáskoruninni.

Tíska og hönnun HI beauty Förðun