Umfjöllun: Ítalía - Ísland 95-87 | Ítalir númeri of stórir á heimavelli

Íslendingar geta þó borið höfuðið hátt eftir þennan leik og þennan glugga. Einn sigur og eitt tap á móti sterku liði Ítala og það er hægt að horfa á næsta glugga með björtum augum um að tryggja liðið áfram í næstu umferð.

Ítalía lagði Ísland 95-87 í Bologna á Ítalíu fyrr í kvöld í fjórðu umferð undankeppni HM í körfubolta. Íslendingar byrjuðu mjög vel og náðu að nýta styrkleika sína mjög vel og voru með forskotið þegar einn leikhluti var búinn. Ítalir náðu þó vopnum sínum, sigu fram úr í öðrum leikhluta og sigldu síðan sigrinum heim í seinni hálfleik. Íslendingar geta þó borið höfuðið hátt eftir þennan leik og þennan glugga. Einn sigur og eitt tap á móti sterku liði Ítala og það er hægt að horfa á næsta glugga með björtum augum um að tryggja liðið áfram í næstu umferð. 

Ísland byrjaði leikinn virkilega vel í Bologna í kvöld og var það augljóst að engin virðing var borin fyrir gestgjöfunum þó að um sterkara lið væri að ræða. Enda var engin þörf á því. Íslendingar unnu síðasta leik liðanna og ákveðnar leiðir vitaðar til að skaða Ítali í körfubolta. Íslendingar keyrðu upp hraðann með Elvar Má Friðriksson í fararbroddi og það virtist vera að Ítalir væru slegnir út af laginu. Tryggvi var í gjörgæslu allan leikinn og því var mjög gott að fá framlagið frá Elvari í upphafi leiks. Mikið var skorað og þegar flautað var til leikhlés á milli fjórðunga var staðan 27-28 fyrir Ísland.

Leikurinn var í jafnvægi fyrstu sjö mínútur annars leikhluta og var staðan 45-44 þegar rúmar tvær mínútur voru til hálfleiks. Þá hrökk Amedeo Della Valle í gang fyrir heimamenn og komst trekk í trekk á vítalínuna ásamt því að hjálpa félögum sínum með stigum utan af velli og stoðsendingum. Ítalir náðu að slíta sig frá Íslendingum og leiddu í hálfleik 53-44 og eins og glöggir lesendur sjá þá lokuðu þeir hálfleiknum á 8-0 spretti. Della Valle hafði komist 11 sinnum á vítalínuna í fyrri hálfleik og hafði skorað úr 10 þeirra en hann lauk hálfleiknum með 15 stig. Ítalir höfðu gert vel í að stöðva Tryggva Hlinason í sínum aðgerðum og þá meina ég að þeir náðu að koma í veg fyrir að Tryggvi fengi boltann. Að auki var hittni heimamanna fyrir utan þriggja stiga línuna 50% og það átti eftir að halda áfram í seinni hálfleiknum.

Heimamenn byrjuðu annan leikhlutann á því að negla niður tveimur þristum í röð og það var ljóst að verkefni Íslendinga yrði erfitt í seinni hálfleik. Níu stiga munur var fljótur að breytast í 15 stiga mun en strákarnir okkar gerðu vel í því að naga muninn niður fyrir tíu stig en þannig varð saga seinni hálfleiksins. Ítalri teygðu forskotið sitt upp í 15 til 19 stig áður en Íslendingar náðu áhlaupi, engin þeirra nógu stór því miður, og náðu muninum niður fyrir tíu stig. Nánast undantekningalaust fylgdi þristur því að ná muninum undir tíu stig og neistinn sem var að myndast hjá íslenska liðinu slökktur áður en hann yrði að báli, Ítalía vann þriðja leikhlutann með fjórum stigum og leiddu með 12 stigum, 74-62, þegar einn fjórðungur var eftir.

Ítalir sýndu gæðin sín á löngum köflum og hleyptu okkar mönnum ekki of nálægt sér en þegar rúmlega tvær mínútur voru eftir af leiknum áttu Íslendingar gott áhlaup og náðu muninum niður í níu stig 93-84 og von glæddist í brjósti manns. Hins vegar töpuðu Íslendingar boltanum tvær sóknir í röð og Ítalir gerðu nóg til að sigla heim kær komnum sigri sem kvittar fyrir tapið í Ólafssal á fimmtudaginn. Lokastaðan 95-87 fyrir heimamenn þeir hoppa yfir Ísland í stöðutöflu H-riðils en bæði lið hafa hlotið sex stig þegar hér er komið við sögu en Ítalir hafa innbyrðis viðureign liðanna og sitja því í öðru sæti og Ísland í því þriðja.

Afhverju vann Ítalía?

Ítalir hafa mikil gæði í sínum leikmannahóp og með fullri virðingu fyrir íslenska landsliðinu þá teljast þeir betra körfubolta lið í dag. Það sýndi sig á löngum köflum en að sama skapi sýndu Íslendingar líka að þeir geta staðið í hárinu á svona stórþjóðum. Það hjálpaði náttúrlega ekki að Martin Hermannssonar naut ekki við en kappinn glímdi við meiðsli úr síðasta leik ásamt því að Ítalir höfðu unnið heimavinnuna á milli leikja og tóku Tryggva Hlinason algjörlega úr umferð á löngum köflum í kvöld. Þar með voru Íslendingar ekki með nægjanlega mörg vopn til að ná í sigurinn. Það hjálpaði heimamönnum líka að hitta úr helming þriggja stiga tilrauna sinna en 14 af 28 þriggja stiga skotum fóru niður.

Hvað gekk illa?

Eins og áður sagði gekk illa að nýta Tryggva Hlinason í kvöld en það sem gekk illa hjá Íslendingum var að halda boltanum innan liðsins. Íslendingar töpuðu 19 boltum í kvöld og úr þeim töpuðu boltum skoruðu Ítalir 16 stig á móti fimm þannig stigum Íslendinga. Þá gekk Íslandi illa að hemja skyttur Ítala eins og komið hefur verið inn á en að auki komust heimamenn 23 sinnum á vítalínuna á móti 13 skiptum okkar manna. Ítalir nýttu að auki 19 af sínum tilraunum.

Bestir á vellinum?

Hjá heimamönnum var það Della Valle sem leiddi liðið sitt en hann skoraði 26 stig og áttu Íslendingar í mesta basli með hann á löngum köflum en hann komst 13 sinnum á vítalínuna og skoraði úr 12 skotum. Honum til halds og trausts var Michele Vitaly með 17 stig en hann hitti úr fjórum af sex þriggja stiga tilraunum sínum.

Hjá Íslendingum var það Elvar Már Friðriksson sem var bestur Hann byrjaði mjög vel en Ítalir náðu að hemja hann betur í seinni hálfleik en hann endaði samt með 30 stig og sex fráköst. Hann keyrði vel á vörn Ítala og setti oft á tíðum mjög góðar körfur en því miður var, eins og áður sagði, neistinn alltaf slökktur um leið og hann myndaðist. Þá verður að nefna Pavel Ermolinskij sem átti mjög góðan leik. Pavel skoraði sex stig, náði í níu fráköst og gaf 10 stoðsendingar. Þá spilaði hann góða vörn á löngum köflum.

Hægt er að glöggva sig betur á tölfræði leiksins hér.

Hvað næst?

Nú tekur við bið eftir næsta landsleiksglugga. Íslendingar eiga eftir tvo heimaleiki og er sá fyrri gegn Hollandi þann 1. júlí næstkomandi. Þá er einnig bið eftir því hvað verður um Rússa í þessari keppni en það er vilji að vísa þeim frá keppni á meðan þeir viðhalda árás sinni á Úkraínu. Seinni heimaleikurinn í næsta glugga ætti að vera gegn þeim þann 4. júli en það verður fróðlegt að sjá hvað gerist í þeim efnum. 

Við getum verið ánægð með þennan landsliðsglugga en ég held að enginn hafi átt von á því að Ísland myndi ná í sigur í honum. Þetta lið, sem talað hefur verið um sem það besta sem við höfum átt, sýndi það og sannaði að ekkert er ómögulegt í þessari undankeppni. Við eigum nokkra lykilmenn inni og vera okkar í næsta riðli er nánast örugg. Þá er hægt að byggja ofan á það góða starf sem hefur verið unnið núna og aldrei að vita nema Ísland geri alvöru atlögu að því að komast á HM í körfubolta.