Tjáir sig ekki um meinta upp­sögn

Ólga hefur verið innan Eflingar eftir ummæli Agnieszku Ewu Ziółkowsku, sitjandi formanns Eflingar, um ráðstöfun fjármuna félagsins á fundi trúnaðarráðs. Heimildir fréttastofu herma að Óskar Örn Ágústsson, fjármálastjóri félagsins, hafi nú sagt upp störfum. Mbl greindi fyrst frá.

Vísir náði tali af Óskari Erni á meðan hann var í sunnudagsgöngutúr en hann neitar að tjá sig um málið.

Linda Dröfn Gunnarsdóttir, framkvæmdastjóri Eflingar, segist ekkert geta staðfest um meinta uppsögn Óskars að svo stöddu, í samtali við Vísi.

Þá segist Agnieszka Ewa ekki geta tjáð sig um málið.

Hafi gert ólögmætan samning um vefsíðugerð

Heimildir fréttastofu herma að umrædd ummæli Agnieszku Ewu hafi varðað samning sem gerður var við Andra Sigurðsson, sem meðal annars er þekktur fyrir aðkomu sína að Facebook-síðu Jæja-hópsins. Samningurinn er sagður hafa snúist um vefsíðugerð og kostnaður við hann hlaupið á mörgum, ef ekki tugum, milljóna.

Svo virðist sem Agnieszka hafi á fundinum ýjað að því að ekki hafi verið staðið að samningum við Andra með lögmætum hætti og að hún, sem formaður Eflingar, væri að „rannsaka“ málið.

Uppfært: Óskar Örn setti sig í samband við Vísi eftir birtingu fréttarinnar og greindi frá því að hann hefði sagt upp af persónulegum ástæðum, að hans frumkvæði, án nokkurs þrýstings frá einum eða neinum og tengdist engum málum innanhúss. Hann hafi ekki viljað tjá sig um málið fyrr í dag enda hafi hann ekki verið búinn að tilkynna samstarfsfólki sínu um uppsögnina.