„Það krafðist þess að læra hratt, hugrekkis og þora að stíga út fyrir þægindarammann“

Gleðiskruddan

Þær segja dagbókina telja hundrað daga þar sem jákvæða inngripið þrír góðir hlutir sé í forgrunni. Í bókinni skráir barnið daglega niður þrjá góða hluti sem áttu sér stað þann daginn. Dögum bókarinnar skiptu þær einnig upp í tuttugu og eitt þemu eins og tilfinningar, styrkleika, þakklæti og svefn.

„Gleðiverkfæri eins og við höfum ákveðið að kalla þau, hafa reynst áhrifarík í því að viðhalda hamingju og öðrum jákvæðum tilfinningum ásamt því að minnka einkenni þunglyndis og kvíða,“

segja Yrja og Marit um aðferðirnar sem eru notaðar í bókinni. Á hverjum degi má einnig finna gleðimola eða gleðifræ dagsins sem tengist þemanu hverju sinni. Þær segja að allir séu ólíkir og því bjóði bókin upp á hlaðborð af gleðiverkfærum svo að hver og einn geti tileinkað sér það sem hentar þeim best

Hugmyndin varð til í náminu

Vinkonurnar segja hugmyndina upphaflega hafa kviknað í diplómanáminu í jákvæðri sálfræði á meistarastigi sem þær luku við sumarið 2020. Þær vildi báðar kynna börn og ungmenni fyrir jákvæðri sálfræði og auka velferð þeirra og út frá því spratt hugmyndin að bókinni sem varð lokaverkefnið þeirra. 

„Við fengum svo góð viðbrögð frá foreldrum barna sem tóku þátt í lokaverkefninu. Bókin bæði jók hamingju og vellíðan barnanna sem og samveru barns og foreldris. Við fundum fyrir því að það var sannarlega þörf fyrir bók af þessu tagi og ákváðum því að gefa út bókina sjálfar,“ segja þær aðspurðar um hvað fékk þær til þess að taka næsta skref með verkefnið.

Eftir að bókin kom út síðasta sumar segjast þær hafa fundið hjá sér að þær vildu bjóða upp á námskeið til þess að miðla þekkingu sinni beint til barnanna og voru fyrstu námskeðin haldin skömmu eftir að bókin kom út.

Hoppuðu í djúpu laugina 

Yrja og Marit höfðu aldrei farið í gegnum ferlið áður að búa til og gefa út bók svo þær lærðu mikið á þeim tíma sem það tók og eru reynslunni ríkari í dag. 

„Við höfðum auðvitað aldrei gert neitt þessu líkt áður. Frá því að velja útlit bókarinnar og markaðssetja og koma henni í sölu. Það krafðist þess að læra hratt, hugrekkis og þora að stíga út fyrir þægindarammann.“

Vilja vitundarvakningu í samfélaginu

Þær segja markmið Gleðiskruddunnar vera að veita ákveðin verkfæri til barna og ungmenna til að hjálpa þeim að takast á við áskoranirnar sem þau verða fyrir á sem uppbyggilegastan hátt. Þær vilja breyta fókusnum úr því að einblína á það sem við viljum sjá minna af í að einblína á það sem við viljum sjá meira af.

„Við vonumst til að Gleðiskruddan geti komið af stað vitundarvakningu í samfélaginu um mikilvægi sjálfsþekkingar og vellíðan barna til að komandi kynslóðir blómstri.“