Rory McIlroy: Yrði stórkostlegt fyrir golfið ef Tiger Woods spilar á Masters

Tiger Woods spilaði heilan hring á Augusta National golfvellinum á þriðjudaginn sem ýtti undir væntingarnar um að hann verði með á mótinu.

Tiger hefur ekki keppt á alvöru golfmóti síðan að hann slasaðist illa á fæti í bílslysi í Kaliforníu 23. febrúar 2021.

Það eru liðin 500 dagar síðan að Tiger var með á móti á bandarísku PGA-mótaröðinni en hann keppti á góðgerðamóti með syni sínum Charlie í lok síðasta árs.

Norður-írski kylfingurinn Rory McIlroy fagnaði fréttum af því að Woods yrði með þegar keppnin hefst á Mastersmótinu í næstu viku.

„Það yrði stórkostlegt fyrir golfíþróttina, fyrir Mastersmótið og fyrir alla ef Tiger væri með,“ sagði Rory McIlroy en hann var staddur í San Antonio í Texas fylki þar sem hann keppir á Valero Texas Open í þessari viku.

„Það myndi bæta svo miklu við mótið. Allt sem Tiger Woods gerir í golfi vekur athygli og stækkar viðburðinn. Það væri æðislegt að hafa hann með okkur,“ sagði Rory.

Tiger Woods spilaði hringinn á Augusta National golfvellinum í vikunni með syni sínum Charlie sem er þegar orðinn öflugur kylfingur. Tiger hefur unnið fimmtán risatitla og sá síðasti kom einmitt á Mastersmótinu árið 2019. Þá hafði hann ekki unnið risamót síðan 2008.

„Hann var þarna á þriðjudaginn og augljóslega var hann að skoða hvað hann getur gert. Það er samt auðvitað bara hann sjálfur og enginn annar sem veit það hvort hann geti klárað svona mót og verið samkeppnishæfur,“ sagði Rory.