Magnaður Morant lét sverfa til stáls gegn Stríðsmönnunum

Morant skoraði 47 stig og hefur ekki gert fleiri stig í leik í úrslitakeppni á ferlinum. Hann var magnaður undir lokin og skoraði síðustu fimmtán stig Memphis í leiknum. Á sama tíma skoraði Golden State aðeins fjögur stig.

Auk þess að skora 47 stig tók Morant átta fráköst og gaf átta stoðsendingar. Enginn samherja hans skoraði meira en fjórtán stig.

Stephen Curry skoraði 27 stig fyrir Golden State og Jordan Poole tuttugu. Stríðsmennirnir voru kaldir fyrir utan þriggja stiga línuna og hittu aðeins úr sjö af 38 skotum sínum þaðan (18,4 prósent).

Boston Celtics sigraði meistara Milwaukee Bucks, 109-86, og jafnaði þar með metin í einvígi liðanna í undanúrslitum Austurdeildarinnar.

Jaylen Brown skoraði þrjátíu stig, þar af 25 í hálfleik og Jayson Tatum 29 fyrir Boston sem var með 46,5 prósent þriggja stiga nýtingu í leiknum. Á meðan var Milwaukee með 16,7 prósent nýtingu fyrir utan. Grant Williams lagði 21 stig í púkkið af bekknum og hitti úr sex þristum eins og Brown.

Giannis Antetokounmpo var með 28 stig, níu fráköst og sjö stoðsendingar hjá Milwaukee og Jrue Holiday nítján.