United að kaupa Malacia en nýr umboðsmaður hefur aukið flækjustigið

Þessi 22 ára Hollendingur var með sama umboðsmann og Frenkie de Jong sem United er einnig að reyna að fá í sínar raðir. Malacia vildi hins vegar að fjölskyldumeðlimur myndi sjá um sín mál og flækjustigið við samningsmálin jókst því í kjölfarið á þeim skiptum. Samkvæmt heimasíðu breska ríkisútvarspins er hins vegar búið að greiða úr flækjunni.

United mun greiða 13 milljónir punda fyrir leikmanninn, en hann var lengi vel undir smásjánni hjá franska liðinu Lyon áður en United lét vita af áhuga sínum.

Malacia hefur leikið allan sinn feril með hollenska liðinu Feyenoord og hefur hann spilað 98 deildarleiki fyrir félagið. Hann á einnig að baki fimm leiki fyrir hollenska landsliðið.

Hann verður fyrsti leikmaðurinn sem nýráðni knattspyrnustjórinn Erik ten Hag fær til félagsins, en margir stuðningsmenn United hafa beðið óþreyjufullir eftir því að sjá eitthvað gerast á leikmannamarkaðnum.