550 höfða mál gegn Uber vegna kynferðisbrota ökumanna

Í gögnum málsins segir að árásirnar hafi átt sér stað í nokkrum ríkjum Bandaríkjanna og þá eru 150 mál til viðbótar í rannsókn.

Það er lögmannsstofan Slater Slater Schulman sem fer með málið fyrir hönd kvennanna en í stefnunni segir að forsvarsmenn Uber hafi vitað það frá 2014 að ökumenn hefðu nauðgað og beitt konur kynferðisofbeldi en þeir hefðu ákveðið að taka vöxt fyrirtækisins fram yfir öryggi farþega sinna.

„Viðskiptamódel Uber gekk út á að veita fólki öruggt far heim en í raun var þeim aldrei annt um öryggi. Það sem skipti máli var vöxtur, á kostnað öryggis farþega,“ segir Adam Slater.

Samkvæmt öryggisskýrslu Uber fyrir Bandaríkin, sem var birt í síðasta mánuði, var tilkynnt um 998 kynferðisbrot árið 2020, þar af 141 nauðgun. Atvikin skipta þúsundum frá 2017.

Í stefnunni er fyrirtækið meðal annars sakað um að hafa ekki kannað bakgrunn ökumanna með fullnægjandi hætti. Talsmenn fyrirtækisins segja hins vegar að úrbætur hafi verið gerðar á starfsemi fyrirtækisins á síðustu árum.