Líflegt í Leirvogsá

Veiðivísir heimsótti Leirvogsá í gær í góðum hóp eina vakt og það er óhætt að segja að áin hafi staðist allar væntingar. Byrjað var neðst í ánni og unnið sig upp eftir en fyrsti laxinn var kominn á land eftir tæpan klukkutíma. Hann veiddist í Kvörninni og var nýgenginn og bjartur en þar slapp annar nokkuð vænn skömmu áður. Það var töluvert líf fyrir neðan þjóðvegsbrú og ekki minnkaði það þegar ofar dró í ánni.

Laxar lágu við Stólpa og á breiðunni við Gömlu brú en staðurinn sem var alveg sjóðheitur var Neðri Skrauti en þar kom einn á land og tveir sluppu af. Það var mikið líf þar og laxinn greinilega í ágætu tökustuði. Berghylur geymdi nokkra laxa sem og Birgishylur. Í Einbúa sáust 10-15 laxar sem litu ekki við neinu, alveg sama hvað var boðið upp á. Það er svo frábært að sjá þetta flotta vatn í ánni og lax á öllum stöðum sem rennt var í að það er ekki hægt annað en að öfunda þá sem eiga daga þarna á næstunni. Það er líklega víða hægt að kvarta yfir rólegu sumri en ekki í Leirvogsá. Hún er komin í 298 laxa á tvær stangir, lax er ennþá að ganga og er vel dreifður um ánna sem er í frábæru vatni. Er hægt að biðja um meira?