Þorsteinn og Birgitta Líf tekjuhæst áhrifavalda

Bjarki Sigurðsson skrifar 18. ágúst 2022 10:13

Þorsteinn Einarsson var tekjuhæstur áhrifavalda en Birgitta Líf kom næst á eftir honum. Vísir/Vilhelm/Sigurjón

Þorsteinn V. Einarsson, kynjafræðingur og umsjónarmaður hlaðvarpsins Karlmennskunnar, var tekjuhæstur áhrifavalda árið 2021 samkvæmt nýju tölublaði Frjálsrar verslunar. Þorsteinn var með 1.369.000 krónur á mánuði en næst á eftir honum kom Birgitta Líf Björnsdóttir, markaðsstjóri World Class, eigandi Bankastræti Club og umboðsmaður, með 1.275.000 krónur á mánuði.

Birgitta Líf er ein af vinkonunum í LXS-hópnum en nokkrar af vinkonunum rötuðu í blað Frjálsrar verslunar. Sunneva Einarsdóttir, áhrifavaldur, var með 564 þúsund krónur á mánuði, Kristín Pétursdóttir leikkona með 548 þúsund krónur, Hildur Sif Hauksdóttir, áhrifavaldur, var með 507 þúsund krónur á mánuði og Ástrós Traustadóttir, dansari, var með 147 þúsund krónur á mánuði.

Uppfært: Þorsteinn sendi frá sér yfirlýsingu eftir hádegi í dag og sagðist vera með um 700 þúsund krónur í laun. Endurskoðandi hans hefði gleymt að skila skattframtali hans. Nánar hér.

TikTok tekur yfir Snapchat

Laufey Ebba Eðvarðsdóttir var tekjuhæst af TikTok-stjörnum Íslands en hún var með 642 þúsund krónur á mánuði. Næst komu Arnar Gauti Arnarsson, Lil Curly, með 507 þúsund, Ágúst Beinteinn Árnason, GústiB, með 503 þúsund krónur, og Embla Wigum með 392 þúsund krónur.

TikTok-stjörnurnar hafa tekið við af snöppurunum svokölluðum en tekjuhæstur þeirra var Hjálmar Örn Jónsson með 552 þúsund krónur. Þar á eftir komu Sólrún Diego með 547 þúsund krónur, Guðrún Veiga með 515 þúsund krónur, Reynir Bergmann með 416 þúsund krónur, Camilla Rut Rúnarsdóttir með 313 þúsund krónur, Viðar Skjóldal, Enski Boltinn, með 302 þúsund krónur.

Þetta virðist hafa verið erfitt ár fyrir OnlyFans-stjörnur Íslands en tekjuhæst þeirra var Edda Lovísa Björgvinsdóttir með 399 þúsund krónur á mánuði. Næst koma Ósk Tryggvadóttir með 394 þúsund krónur, Birta Rós Blanco með 148 þúsund krónur, Ingólfur Valur Þrastarson með 127 þúsund krónur og Klara Sif Magnúsdóttir með 118 þúsund krónur.

Æði að vera í Æði

Fjórða þáttaröðin af Æði-þáttunum kom út í ár en Patrekur Jaime var tekjuhæstur af Æði-strákunum með 440 þúsund krónur á mánuði. Bassi Maraj var með 384 þúsund krónur og Binni Glee með 289 þúsund krónur á mánuði.

Samfélagsmiðillinn Twitter er alltaf geysivinsæll meðal landsmanna en tekjuhæst þeirra sem eru virkir þar er Ólöf Tara Harðardóttir, stjórnarkona Öfga. Hún var með 618 þúsund krónur á mánuði. Þórhildur Gyða Arnarsdóttir, stjórnarkona Öfga, var með 463 þúsund krónur á mánuði, Edda Falak með 356 þúsund krónur, Siffi G var með 253 þúsund krónur á mánuði og Kolbrún Birna Hallgrímsdóttir með 108 þúsund krónur á mánuði.

Tekjublað Frjálsrar verslunar kom út í dag en rétt er að árétta að um er að ræða útsvarsskyldar tekjur á árinu 2021 og þurfa þær ekki að endurspegla föst laun viðkomandi. Munurinn getur falist í launum fyrir setu í nefndum og önnur aukastörf og hlunnindi vegna kaupréttarsamninga. Í launum sumra kann að vera falinn bónus vegna ársins 2020 sem var greiddur árið 2021.

Miðað er við útsvarsstofn samkvæmt álagningarskrá en í tölunum eru ekki fjármagnstekjur, til dæmis af vöxtum, arði eða sölu hlutabréfa. Sleppt er skattfrjálsum dagpeningum, bílastyrkjum og greiðslum í lífeyrissjóði. Þá ber að hafa í huga að inn í tekjunum geta líka verið einskiptisgreiðslur vegna úttektar á séreignasparnaði hjá lífeyrissjóði.

Verktakagreiðslur flokkast ekki sem útsvarsskyldar tekjur og eru því ekki teknar fyrir í álagningaskrá Ríkisskattstjóra sem Tekjublaðið styðst við.

Tekjur Samfélagsmiðlar Skattar og tollar