Systurnar báðar heim í föðurfaðminn á Hlíðarenda

Ásdís sleit krossband í leik með Val skömmu eftir að hún samdi við Lugi í mars í fyrra og mætti því meidd út. Það setti strik í reikninginn ytra en hún var komin í leikmannahóp liðsins undir lok síðustu leiktíðar þegar hún hafði náð sér.

Ásdís er tvítug en hún skoraði 24 mörk og gaf tíu stoðsendingar í tólf leikjum fyrir Val veturinn 2020-2021 áður en hún hélt út til Svíþjóðar. Hún var þá hluti af Valsliðinu sem vann þrefalt árið 2019.

„Ásdís er bæði óvænt en um leið góð viðbót við okkar leikmannahóp. Hún þarf tíma til að koma sér aftur almennilega til baka inn á völlinn eftir meiðslin og þann tíma fær hún hjá okkur,“ er haft eftir Ágústi Jóhannssyni, þjálfara Vals um endurkomu Ásdísar í tilkynningu frá Val.

Ágúst er jafnframt faðir Ásdísar en hann endurheimtir báðar dætur sínar frá Lundi. Lilja Ágústsdóttir, yngri systir Ásdísar, samdi við Val fyrr í sumar, en hún hafði einnig verið á mála hjá Lugi.

Valur hefur einnig fengið Hrafnhildi Önnu Þorleifsdóttur frá FH og Söru Dögg Hjaltadóttur frá HK Skien fyrir komandi átök í Olís-deildinni.

Valskonur urðu bikarmeistarar á síðustu leiktíð, lenti í 2. sæti í deildarkeppninni og tapaði 3-1 í fyrir Fram í úrslitaeinvíginu um Íslandsmeistaratitilinn.