Segir Seðlabankann refsa með svipu í aðdraganda kjarasamninga

„Hvernig Seðlabankinn er refsar verkalýðshreyfingunni og notar einhverja svipu í aðdraganda kjarasamninga. Það er alveg ljóst að bara hækkun á afborgunum á venjulegu húsnæðisláni hefur nánast étið upp allan þann ávinning síðustu ára sem við höfum náð í kaupmætti og ofan á það bætast síðan verðlagshækkanir.“

Stýrivextir Seðlabankans voru í morgun hækkaðir í áttunda sinn í röð - og í þetta skiptið fóru þeir úr 4,75% upp í 5,5%. Vextir hafa ekki verið hærri í sex ár.

Ásgeir Jónsson, seðlabankastjóri segir þetta gert til að koma í veg fyrir „ofþenslu og æsing í kerfinu.“ Fólk eigi að taka minna af lánum, fyrirtæki síður að ráðast í fjárfestingar og stjórnvöld að halda að sér höndum.

VR og Landssamband íslenzkra verzlunarmanna hafa birt kröfugerð sína gagnvart Samtökum atvinnulífsins fyrir komandi kjarasamningslotu. Félögin gera meðal annars kröfu um fjögurra daga vinnuviku, 30 daga orlofsrétt og að áunnin réttindi færist óskert milli atvinnurekenda, meðal annars veikinda- og orlofsréttur.

Sjá nánar: VR krefst fjögurra daga vinnuviku og aðkomu stjórnvalda

Í kröfugerðinni segir um launaliðinn að meginmarkmiðið sé að verja þann árangur sem náðist í síðustu kjarasamningum fyrir þá sem eru með lægstu laun en jafnframt að tryggja að allt launafólk fái notið jafnræðis þegar kemur að launahækkunum. Aukinn kaupmáttur ráðstöfunartekna liggi til grundvallar launakröfum félaganna og að lágmarkslaun eigi að duga til framfærslu.

Ragnar segir kröfuna er varðar launaliðinn vera skýra.

„Það er bara krafa okkar félagsmanna um kaupmáttaraukningu. Það hlýtur að gefa augaleið hvað það þýðir í 10% verðbólgu. Við getum ekki gefið afslátt af virði okkar vinnu á meðan Seðlabankinn og fjármagnseigendur gera kröfur á það að sínir fjármunir haldi verðgildi sínu í sömu verðbólgu.“

Hann segir kröfugerðina njóta mikils stuðnings - forsvarsmenn félaganna hafi skýrt umboð félagsmanna. Hvað varðar forgangsröðun segir hann félögin munu sækja það hart að halda áfram styttingu vinnuvikunnar og þá muni þau einnig krefjast sama orlofsréttar og opinberir starfsmenn sömdu um, það er að segja 30 daga.

Þegar Ragnar var spurður út í aðkomu stjórnvalda segir hann að Seðlabankinn sé honum efst í huga. Félögin geri kröfu um eðlilegt vaxtastig og verðlagsfrystingu í ákveðnum vöruflokkum.

Halldór Benjamín Þorbergsson framkvæmdastjóri Samtaka atvinnulífsins kveðst sjaldan hafa verið eins bjartsýnn í upphafi kjarasamningslotu. Í kröfugerðum sé þó að finna ítrustu kröfur stéttarfélaga og að þær beri að skoða í því ljósi.

„Til langs tíma er hins vegar margt í kröfugerðunum sem við höfum móttekið sem er ekki endilega fjarlægt þeirri mynd sem við hjá samtökum atvinnulífsins viljum sjá. En spurningin er hvernig okkur tekst núna á næstu vikum að mála þá mynd í sameiningu með verkalýðshreyfingunni.“