Eftirsjá Illuga og Elísabetar: „Enginn lét sér til hugar koma að víkingasveit yrði kölluð út“

Hrafn var þann 31. október 2020 handtekinn á Brú í Hrútafirði en sérsveit ríkislögreglustjóra og lögreglan á Norðurlandi vestra tóku þátt í aðgerðunum í Hrútafirði. Hrafn segir í stefnunni gegn íslenska ríkinu að lögregla hafi gengið fram með óþarfa hörku við handtökuna. 

„Í þann mund er stefnandi var að ganga til náða hafi birst honum vopnuð víkingasveit utan úr myrkrinu. Hafi sveitin ógnað honum með byssum, sem hann taldi vera vélbyssur, og hafi honum verið skipað að hafa hendur sýnilegar, ganga frá húsinu og í átt til lögreglunnar og fara niður á hnén,“ segir í stefnunni en Hrafn ræddi veikindin og handtökuna í helgarblaði Fréttablaðsins.

Hrafn var í kjölfarið látinn undirgangast læknisskoðun hjá heimilislækni sem mat það svo að Hrafn væri „í maníu“ og eftir að hafa verið fluttur handjárnaður með sjúkrabíl til Reykjavíkur var hann nauðungarvistaður gegn vilja sínum á bráðageðdeild 32C á Landspítalanum. Dvölin var framlengd í tvígang og honum leyft að fara 7. dsember 2020, 37 sólarhringum eftir handtökuna. 

Illugi, bróðir Hrafns, skrifar í færslu sem hann birti á Facebook í gær að frá fyrstu stundu hafi verið hörmulegt að heyra af því sem gerðist á Brú. Ástvinir Hrafns hafi haft áhyggjur af honum, með réttu eða röngu, og beðið um að litið yrði til hans. 

„Þannig var það, því miður. Enginn lét sér til hugar koma að víkingasveit yrði kölluð út. Það sem þar gerðist var augljóslega hvorki í samræmi við beiðni ástvina hans né almennilega lögregluhætti, og allra síst þann mann sem mætti lögreglumönnum á Brú og var bersýnilega í alla staði til friðar,“ skrifar Illugi í færslunni. 

„Ég vona að úr þessu máli verði leyst fljótt og vel þannig að yfirvöldin geti lært af. Og að aldrei á þeim tveim árum sem liðin eru síðan skuli Hrafn bróðir minn hafa greinst með það mein, sem hann berst nú við upp á hæl og hnakka, þrátt fyrir ótal rannsóknir af öllu tagi, það hljómar einfaldlega nánast eins og glæpur.“

Elísabet systir þeirra slær á svipaða strengi í færslu sem hún birti sömuleiðis á Facebook í gær. Aðstandendur hafi aldrei búist við að sérsveit yrði kölluð út vegna Hrafns.

„Hrafn bróðir minn varð fyrir hrottalegu ofbeldi og ólöglegri handtöku eins og hann lýsir í þessu fína viðtali sem Fréttablaðið birti við hann í gær. Ég verð að játa að ég átti ákveðinn þátt í því, það voru mistök og ég harma það alla daga,“ skrifar Elísabet. 

„Ég hafði talið að hann hafði gengið fram af sér við fjöruhreinsun og orðið veikur þess vegna. Þegar ég hringdi í lögregluna bjóst ég við að það kæmu tveir alúðlegir lögregluþjónar frá Blönduósi með lækni sem vissi sínu viti. Þeir Hrafn hefðu getað rætt málin í sameiningu.“