Helstu fé­laga­skipti kvöldsins: Dest til AC Milan, Al­freð til Lyng­by og Chelsea í leit að leikmönnum

Fyrr í dag var greint frá því að ítalski framherjinn Mario Balotelli verður ekki áfram samherji Birkis Bjarnasonar í Tyrklandi. Balotelli mun leika í Sviss á komandi leiktíð. Þá keypti Chelsea varnarmanninn Wesley Fofana frá Leicester City á 70 milljónir punda. Hinn 21 árs gamli Fofana skrifaði undir sjö ára samning við Lundúnaliðið.

Englandsmeistarar Manchester City fengu varnarmanninn Manuel Akanji frá Borussia Dortmund en hann er annar leikmaðurinn sem fer frá Dortmund til Man City í sumar. Hinn er framherjinn Erling Braut Håland. Þeir sem sjá um leikmannamál Southampton hafa einnig verið duglegir í dag og stefnir í svefnlausa nótt á skrifstofu þeirra.

Íslendingalið FC Kaupmannahöfn sótti framherja og er við það að selja annan til Grikklands. Íslenski landsliðsframherjinn Alfreð Finnbogason er svo genginn í raðir Íslendingaliðs Lyngby. Þar hittir hann fyrir Frey Alexandersson, þjálfara, og Sævar Atla Magnússon.

• Bandaríski bakvörðurinn Sergiño Dest fór í kvöld á láni til AC Milan frá Barcelona. Spænska félagið þurfti að lækka launakostnað sinn á einn hátt eða annan eftir að hafa fengið að skrá Jules Koundé í leikmannahóp sinn. Milan hefur forkaupsrétt á bakverðinum næsta sumar og getur fengið hann fyrir litlar 20 milljónir evra. 
• Danski framherjinn Martin Braithwaite er búinn að samþykkja að rifta samningi sínum í Katalóníu, talið er að hann gæti farið til Valencia. 
• Bernardo Silva, leikmaður Manchester City, staðfest að hann muni ekki færa sig um set frá Manchester til Katalóníu í sumar en Börsungar hafa ekkert farið í felur með áhuga sinn á leikmanninum.
• Manchester United hefur ákveðið að lána vængmanninn Amad Diallo til Sunderland sem leikur í ensku B-deildinni. Amad var á láni hjá Rangers í Skotlandi á síðustu leiktíð en kom lítið við sögu.
• Martin Dúbravka mun fara til Man United á láni frá Newcastle United og verða varamarkvörður liðsins. Man Utd getur svo keypt hann næsta sumar.
• Adnan Januzaj, fyrrum leikmaður Manchester United, hefur samið við Sevilla en hann kemur á frjálsri sölu eftir að samningur hans við Real Sociedad rann út í sumar.
• Sevilla hefur að sama skapi leyft Lucas Ocompos að fara til Ajax þar sem hann mun fylla skarð brasilíska vængmannsins Antony en Man United keypti hann á fúlgur fjár á dögunum. Ocompos er 28 ára gamall og á að baki 10 A-landsleiki fyrir Argentínu.
• Carlos Soler er á leiðinni frá Valencia til París Saint-Germain. Miðjumaðurinn á að fylla skarð Ander Herrera, sem fór heim til Athletic Bilbao, og Idrissa Gana Gueye sem ku vera á leið aftur til Everton. Einnig er talið að Everton sé að festa kaup á James Garnier, miðjumanni Man United.
• Chelsea bauð í kjálkabrotinn Pierre-Emerick Aubameyang en Barcelona neitaði tilboðinu. Talið er að Chelsea muni hækka boð sitt áður en glugginn lokar.
• Chelsea bauð einnig í Edson Álvarez, leikmann Ajax. Hann getur spilað bæði sem miðvörður eða sem aftasti miðjumaður. Tilboðið hljóðaði upp á 43 milljónir punda en ekki er ljóst hvort Ajax samþykkti tilboðið eða ekki.

Félagaskiptagluggar í hverju landi fyrir sig lokast á mismunandi tímum á morgun. Í Þýskalandi og á Ítalíu lokar gluggarnir klukkan 15.00. Í Frakklandi lokar hann 21.00 og á Englandi og Spáni loka þeir klukkustund síðar eða klukkan 22.00.