Arsenal lík­legast til að vinna Evrópu­deildina

Skytturnar frá Lundúnum hafa byrjað tímabilið vel þó svo að liðið hafi tapað gegn Manchester United. Það eru liðin tvö sem Gracenote spáir hvað bestu gengi í keppninni.

Arsenal er talið eiga 12 prósent líkur á að vinna eins og staðan er í dag á meðan það eru níu prósent líkur að Man United vinni keppnina. Líkurnar breytast umferð frá umferð þar sem enn er óvíst hvaða lið falla úr Meistaradeild Evrópu og niður í Evrópudeildina.

Real Betis á svo fimm prósent líkur og lærisveinar José Mourinho í Roma eiga fjögur prósent líkur en liðið vann Sambandsdeild Evrópu á síðustu leiktíð.

Evrópudeildin hefst í dag og verður fjöldi leikja sýndur beint á rásum Stöðvar 2 Sport. Þar ber helst að nefna leik Man United og Real Sociedad. Hér að neðan má sjá dagskrá kvöldsins í Evrópudeildinni.