Hildur og Gísli eiga von á barni

Þetta kemur fram á Facebook-síðu Hildar þar sem fram kemur að von sé á nýjum fjölskyldumeðlimi í apríl næstkomandi.

Á síðasta ári greindi Hildur frá því í viðtali við DV að hún hafi sjálf kynnst því af eigin raun að ekki sé sjálfgefið að eignast barn. Þá hafði hún farið í fjórar meðferðir hjá Livio, sem sérhæfir sig í frjósemismeðferðum, á tveimur árum, án árangurs.

Hildur hefur verið ötul baráttukona fyrir því að regluverk í kringum tæknifrjóvganir verði einfaldað auk þess sem að hún hefur barist fyrir auknu frelsi og sjálfsákvörðunarrétti fyrir þá sem þurfa að nýta sér tæknifrjóvgun.

Frumvarp hennar þess efnis var lagt fram á Alþingi í vor, aftur nú í haust og er nú í vinnslu velferðarnefndar. Í framsögu frumvarpsins tók Hildur fram að persónuleg reynsla hennar hefði opnað augu hennar fyrir því sem betur megi fara í regluverkinu og hún nýtti sér það við að semja frumvarpið en tók þó fram að engar breytingar sem hún lagði til myndu nokkru breyta í hennar persónulegu vegferð við að reyna að eignast barn.

Sem fyrr segir eiga Hildur og Gísli von á barninu í apríl. Þetta er þeirra fyrsta barn saman en fyrir á Gísli þrjú börn.