„Þetta er svo mikill hryllingur“

Í dag skrifaði Hrafnhildur P Þorsteinsdóttir, hestakona, bréf til Svandísar Svavarsdóttur, matvælaráðherra, sem hún birti einnig hér á Vísi. Þar segir hún að ekkert hafi verið gert í málefnum 25 hrossa sem eru á bæ einum í Borgarfirði. Hrossin hafa þurft að sæta ansi illri meðferð.

Hrafnhildur hefur haft samband við þýsku dýraverndunarsamtökin AWF/TSB og beðið þau um að skoða málið. Samtökin munu þó bíða með rannsókn sína ef gripið verður til aðgerða strax.

Í samtali við fréttastofu segir Hrafnhildur að málið einskorðist ekki við hross eigendanna. Kýr og sauðfé þeirra séu einnig í afar slæmu ástandi. 

„Þetta er svo mikill hryllingur. Ég veit að hann er líka með fé sem er mjög illa haldið og kýrnar hafa ekki farið út í tvö ár. Hvers konar líf er það?“ segir Hrafnhildur. 

Ólíklegt að þeir lifi af

Steinunn Árnadóttir er sú sem greindi fyrst frá illri meðferð á hrossunum í Borgarfirði og segir hún að það sé ólíklegt að hestarnir lifi veturinn af. Þeir séu alls ekki tilbúnir í íslenskan vetur.

„Það er búið að eyðileggja fyrir þeim möguleikann að lifa veturinn af með því að hafa þá svona lokaða inni. Þeir eru bara berir. Ég var þarna upp eftir einmitt áðan og þá sá ég einn sem ég sá ekki síðast. Hægri hliðin á honum er bara ber. Skinnið á honum er bara farið. Það er ekki einu sinni hár,“ segir Steinunn í samtali við fréttastofu. 

Hún, og fleiri, hafa reynt og reynt að fá svör hjá MAST en lítið fengið úr krafsinu. Ýmist er skellt á, vísað annað eða sagt að málefnið heyri ekki undir stofnuninni. Þá er ekki hægt að ræða við eigendur hrossanna.

„Þeir eru á svo vondum stað að það er ekki ómaksins vert að reyna það einu sinni. Þú nálgast ekki þetta fólk, þú veist ekkert á hverju þú átt von. Það er margbúið að vara mig við því að nálgast þau ein. Ég fór og heimsótti móður hans og hún var ekki heima. Þau sáu til mín og hringdu á lögreglu,“ segir Steinunn. 

Lofaði þeim góðu heimili

Ingibjörg Gunnarsdóttir seldi þrjú hross til fólksins en þegar hún sá myndir af þeim eftir veru hjá þeim vildi hún fá þá til baka. Hún leitaði til MAST sem sendu bréf um að málið félli ekki undir þeirra starfssvið. Undir bréfið skrifaði héraðsdýralæknir Norðvesturumdæmis. 

Fréttastofa ræddi við Ingibjörgu í dag þar sem hún segir yfirvöld hafa brugðist hrossunum. 

„Þau fría sig bara af ábyrgð og segjast ekkert hafa með þetta að gera. Hver á þá að gera það? Yfirvöld hafa algjörlega brugðist og virðast ekki hafa neinn áhuga eða eru bara útbrunninn. Þau hafa ekki skilning að það sé ekki eðlilegt að hrossið sé grindhorað á þessum árstíma, sé að fella feld og með skallabletti,“ segir Ingibjörg.

Hún segist augljóslega ekki hafa vitað af því hvernig yrði komið fram við hrossin þegar hún seldi þau. Kaupandinn, sem er kærasta eigandans, hafði samband við Ingibjörgu á Instagram og reyndi að fá fimmtán folöld fyrst um sinn. Kærastan lofaði hrossunum góðu heimili líkt og sjá má í skjáskotunum hér fyrir neðan. 

Eftirlitsmaður MAST á Vesturlandi vísaði á héraðsdýralækni þegar reynt var að ná tali af honum. Fréttastofa hefur reynt að ná sambandi við héraðsdýralækni í dag, án árangurs.

Uppfært klukkan 16:02:

MAST sendi frá sér tilkynningu rétt í þessu þar sem sagt var frá því að stofnunin hafi haft eftirlit með hrossunum. Við það eftirlit var skráð alvarlegt frávik við holdafar hluta hrossanna. 

Aðgerðir MAST miðuðust við að hestunum yrði hleypt út og þau fóðruð með beitinni. Frá því að hestunum var hleypt út hefur verið haft eftirlit með þeim. 

Málið er enn til meðferðar hjá stofnuninni og verður kröfum um úrbætur fylgt eftir. 

Hér fyrir neðan má lesa yfirlýsingu MAST í heild sinni.