Dómsmálaráðherra segir brýnt að breyta útlendingalögum

Sigmundur Davíð Gunnlaugsson formaður Miðflokksins spurði Bjarna Beneditksson formann Sjálfstæðisflokksins út í þessi mál í fyrirspurnartíma á Alþingi í morgun. Þar sagði Bjarni meðal annars að vísbendingar hefðu komið fram frá löggæsluyfirvöldum um að vegabréf frá Venesuela gengju kaupum og sölum, vegna þess hvað flóttafólk þaðan ætti auðvelt með að koma til Íslands.

„Að þeir sem komi með slík vegabréf standi í skuld við þá sem útvegi slík vegabréf og þurfi á komandi árum að finna leiðir til að fjármagna þá skuld. Að það séu glæpagengi sem séu að senda börn á ferð til að finna þá staði þar sem börn njóta sérstakrar verndar umfram aðra. Okkar hugur er hjá slíkum börnum sem verða að einhvers konar verkfæri í höndum glæpagengja," sagði Bjarni.

Sigmundur Davíð gaf ekki mikið fyrr svör ráðherrans og lísti eftir stefnu stjórnvalda í málaflokknum.

„Hæstvirtur fjármálaráðherra fór hér ágætlega yfir og ítrekaði áhyggjur mínar af málaflokknum og hvernig hann hefur þróast. En það var fátt um svör um hvernig brugðist yrði við. Hvenær kemur frumvarp hæstvirts dómsmálaráðherra. Verður búið að bæta það frumvarp þannig að það hafi meiri áhrif en það myndi gera eins og við sáum það síðast," sagði Sigmundur Davíð.

Jón vill mæla fyrir frumvarpinu í næstu viku

Jón Gunnarsson dómsmálaráðherra vill mæla fyrir nýju útlendingafrumvarpi í næstu viku nú þegar hann telur samkomulag hafa náðst um málið milli stjórnarflokkanna.„

„Hvort ég næ samstöðu við stjórnarandstöðuna læt ég liggja á milli hluta. En það þarf að vera samstaða milli stjórnarflokkanna og ég tel að hún sé til staðar.“

Þannig að málið sofni ekki eina ferðina enn inni í nefnd?

Nei, nú þarf þetta að verða forgangsmál að klára. Vegna þess að hér er að býta á okkur vandi sem er mikilvægt að bregðast við. Frumvarpið er hluti af þeim viðbrögðum sem við erum að reyna að grípa til í ljósi ástandsins," segir dómsmálaráðherra.

Breytingar á frumvarpinu lúti að grunnskoðun þeirra sem væru að koma til landsins, frestum í tengslum við afgreiðslu mála, lúkningu á þjónustu við fólk sem hafi fengið frávísun og fleiru. Að auki væri verið að vinna að því að styrkja landamæra- og löggæslu. Löggæsluyfirvöld í Evrópu hefðu áhyggjur af ákveðinni misnotkun á hælisleitendakerfinu.

„Það getur tengst ýmis konar starfsemi eins og mansali og slíku. Þar sem glæpasamtök eru að nýta sér neyð þessa fólks sem er á flótta," segir Jón.

Það hefði til dæmis heyrst varðandi konur á flótta frá Úkraínu. Þá væru vísbendingar um misnotkun á vegabréfum frá Venesuela en flóttafólk þaðan á greiðan aðgang að Evrópu.

„Og það vekur athygli að hér eru einstaklingar og jafnvel fjölskyldur að koma með nýútgefin vegabréf frá Venesuela sem eru löglegir pappírar. En það er jafnvel fólk sem ekki er augljóslega frá Suður Ameríku eða þessum heimshluta.“

Þú telur að það sé sátt milli stjórnarflokkanna um innihald þessa frumvarps, þannig að þú ert bjartsýnn á að það nái fram fyrir jól?

„Já, ég er bara mjög bjartsýnn á það og ég tel það reyndar alveg bráðnausynlegt," segir Jón Gunnarsson.