Atvikið átti sér stað við námuna Långgruvan fyrir utan Norberg í Västmanland í Svíþjóð í apríl fyrr á þessu ári.
Maðurinn var ákærður fyrir nauðgun og tilraun til manndráps. Eftir að hafa ýtt konunni í holuna reyndi hann í að minnsta kosti tvígang að grýta hana áður en hann yfirgaf staðinn.
Tveimur sólarhringum síðar barst lögreglu og sjúkraliði tilkynning frá öðrum manni sem hafði verið með börnin sín á gangi í skóglendi fyrir utan Norberg. Hann hafði þá heyrt hjálparköll frá konunni.
Björgunarliði tókst að hífa konuna upp og var hún flutt með þyrlu á sjúkrahús. Hún var þá tvífótbrotin og hafði ofkælst. Konan sagði í skýrslutöku að Amini hafi viljað giftast sér til að fá dvalarleyfi í Svíþjóð.
Sænskir fjölmiðar segja að Amini eigi þrjú börn úr fyrra sambandi og hafði áður verið giftur. Áður en hann ýtti konunni ofan í holuna segir hún að á hann hafi sagt henni frá því að hann hafi drepið fyrrverandi eiginkonu sína. Fyrrverandi eiginkonu Amini er saknað.
Fyrir dómi neitaði maðurinn þó bæði að hafa nauðgað og ýtt konunni í holuna sem og að hafa banað fyrrverandi eiginkonu sinni.
Auk þess að vera dæmdur í lífstíðarfangelsi og til brottvísunar úr landi var manninum einnig gert að greiða konunni 545 þúsund sænskra króna í skaðabætur, um sjö milljónir íslenskra króna.
