Segir Árna hafa áreitt fleiri stúlkur og þverbrotið siðareglur

Þetta segir Hannes S. Jónsson, formaður Körfuknattleikssambands Íslands, og byggir á þeim upplýsingum sem sambandið hefur fengið vegna málsins.

Árni Eggert var í október rekinn frá Haukum eftir að upp komst um það að hann hefði ítrekað sent ungum leikmönnum annarra félaga, 15-16 ára stúlkum, óviðeigandi skilaboð. Hann var einnig aðstoðarþjálfari U15-landsliðs drengja og U16-landsliðs stúlkna í sumar en mun ekki starfa frekar fyrir KKÍ.

Árni játti því í samtali við Vísi í síðustu viku að óviðeigandi hefði verið að senda stúlkunum skilaboð en sagði þau ekki hafa verið klámfengin eða dónaleg.

„Málið kemur fyrst inn á borð til okkar frá félagi þar sem grunur hafði vaknað um brot gagnvart stúlkum. Öll félögin sem koma að málinu hafa brugðist mjög vel við,“ segir Hannes í samtali við Vísi.

Þjálfari eigi aldrei að vera í svona samskiptum við börn undir lögaldri

Málið hafi farið inn á borð samskiptaráðgjafa íþrótta- og æskulýðsstarfs sem og inn á borð barnaverndaryfirvalda og lögreglu.

„Við í KKÍ erum í raun til hliðar í málinu af því að viðkomandi var ekki í vinnu hjá okkur þegar þetta kemur upp, þó að hann hafi verið aðstoðarþjálfari landsliða síðasta sumar. En við fylgjumst með og sendum málið til samskiptaráðgjafa og viðkomandi yfirvalda sem skoða málið.

Við stöndum með þolendum og það er alveg ljóst að gerandinn í málinu þverbraut siðareglur íþróttahreyfingarinnar með framferði sínu. Þjálfari, eða nokkur annar, á aldrei að vera í svona samskiptum við sína iðkendur, börn undir lögaldri, eins og viðkomandi þjálfari gerði,“ segir Hannes.

„Þurfum að styðja við þessa þolendur á allan máta sem hægt er“

Árni tjáði Vísi í síðustu viku að skilaboðin sem hann sendi stúlkunum hefðu snúist um körfubolta en einnig um nám og félagslíf þeirra. Hann sagði stúlkurnar fjórar en „mögulega fleiri“, og mismunandi væri hver hefði átt frumkvæðið. Hannes segir það rangt.

„Það er alveg ljóst miðað við þær upplýsingar sem við höfum að gerandinn fór ansi frjálslega með sannleikann í þessu viðtali,“ segir Hannes.

„Hann hefur verið í sambandi við fleiri stúlkur og það er hann sem að á frumkvæðið að þessum samskiptum. Við þurfum að styðja við þessa þolendur á allan máta sem hægt er. Þjálfari á aldrei að vera í svona samskiptum við börn undir 18 ára aldri. Forráðamenn barnanna eiga alltaf að vera með í samskiptum,“ segir Hannes.

Mikilvægt að leitað sé til samskiptaráðgjafa

Hann segist ekki hafa upplýsingar um það hvort að Árni hafi áður gerst sekur um brot, þegar hann starfaði hjá öðrum félögum. „Það er þó eitt af því sem verið er að skoða í málinu. Og ef að einhver telur að hann eða aðrir hafi brotið á sér þá hvetjum við viðkomandi til að hafa samband við samskiptaráðgjafa. Það skiptir miklu máli.

Það er alveg ljóst að siðareglur voru margbrotnar í þessu máli og að þolendurnir í þessu öllu gerðu ekkert rangt. Og það er svo mikilvægt að ef að fleiri telja á sér brotið, sama í hvaða íþróttagrein eða hvar það er, að þau leiti til samskiptaráðgjafa eða þar til bærra yfirvalda,“ segir Hannes.

Á heimasíðu samskiptaráðgjafa íþrótta- og æskulýðsstarfs er hægt að tilkynna um áreiti eða einelti og fá leiðbeiningar eða aðstoð.