Grænþvottur: Allir þurfa að vera fullvissir um að loforð standist

„Grænþvottur er hugtak sem er frekar nýtilkomið í almenna umræðu en ég tel vera nokkuð mikla vitundarvakningu um það um þessar mundir. Það hefur til dæmis verið mjög ánægjulegt að sjá hvað þeim fyrirtækjum fer fjölgandi sem eru ekki aðeins að segja frá því sem vel hefur tekist, heldur einnig að greina frá þeim atriðum sem stefnt er að því að bæta til að stuðla að sjálfbærni,“ segir Kristbjörg M. Kristinsdóttir formaður IcelandSIF.

Fundurinn verður haldinn í Veröld, húsi Vigdísar og hefst klukkan 08.30 á mánudagsmorguninn. Fyrirlesarar eru Hugo Gallagher, aðstoðarframkvæmdastjóri EuroSIF og forstöðumaður stefnumótunar og ráðgjafar og Eric Pedersen, yfirmaður sjálfbærra fjárfestinga hjá Nordea og varaformaður DanSIF.

Þá verða í pallborðsumræðum Unnur Gunnarsdóttir varaseðlabankastjóri fjármálaeftirlits Seðlabanka Íslands, Aðalheiður Snæbjarnadóttir, sjálfbærnistjóri Landsbankans og Gunnar S. Magnússon, yfirmaður sjálfbærni og loftlagsmála og meðeigandi hjá Deloitte.

Markmið fundarins er að fara yfir þýðingu grænþvotts frá mismunandi sjónarhornum en hugtakið grænþvottur var fyrst notað af Jay Westerveld á níunda áratugnum. Hugtakið felur í sér að fyrirtæki setji fram rangar eða villandi upplýsingar og gefi þannig ranga mynd, eða veiti villandi upplýsingar um sjálfbærni vöru eða þjónustu.

Kristbjörg segir mikilvægt að taka umræðuna nú um grænþvott. Enda séu viðamiklar breytingar á laga- og regluverkinu framundan, breytingar sem verða innleiddar á Íslandi í kjölfar innleiðinga þeirra hjá Evrópusambandinu.

„Eftirspurnin eftir sjálfbærum fjárfestingum hefur verið að aukast mikið og að mínu mati hafa sjálfbærar fjárfestingar farið fram úr sjálfu regluverkinu,“ segir Kristbjörg sem fagnar þeim breytingum sem framundan eru og telur að þær verði öllum til góðs. „Rétt eins og gilti með góða stjórnarhætti á sínum tíma.“

Þá segir hún mikilvægt að allir leggist á eitt við að sporna við grænþvotti. Til dæmis sé mikilvægt að aðilar, eins og IcelandSIF, miðli þeirri þekkingu sem er að byggjast upp meðal aðildarfélaga áfram til sem flestra.

„Grænþvottur dregur úr trúverðugleika fjármálaafurða og neytendur og fjárfestar þurfa að vera fullvissir um að staðið sé við þau loforð sem búið er að veita. Þess vegna skiptir svo miklu máli að allir skilji hvaða áhætta hlýst af grænþvotti og sömuleiðis að upplýsingar frá fjölmörgum aðilum eru liðir í keðju sem má ekki rofna,“ segir Kristbjörg og bætir við: „Undanfarið höfum við verið að sjá fjármálafyrirtæki í Evrópu verða fyrir ámæli í kjölfar ásakana um grænþvott. Þetta skaðar fyrirtækin mjög enda snýst það að sporna við grænþvotti um að kynna sjálfbærar fjármálaafurðir rétt og af heilindum til þess að fjárfestar geti treyst því að þær stuðli að þeim jákvæðu breytingum sem þeim er ætlaða að gera.“