„Það þarf því ekki að koma á ó­vart ef tónninn breytist þegar mótið hefst fyrir al­vöru“

„Aðdragandi þessarar ákvörðunar er langur og skýrist kannski af því að þegar FIFA tekur þessa ákvörðun þá eru samtökin í verulegum fjárhagskröggum af því svissneskt sjónvarpsfyrirtæki sem þau hefðu verið í miklum viðskiptum við hafði farið á hausinn og samtökin voru búin að spenna bogann mjög hátt. Voru vön því að það streymdu peningar, bæði til sérsambanda og í vasa forystumanna. Það gerði það að verkum að menn voru til í að samþykkja boð sem hefði undir eðlilegum kringumstæðum aldrei komið til greina.“

„Reynslan sýnir okkur að umræða um mót sem fara fram á umdeildum stöðum er oft mjög hávær en tónninn breytist um leið og boltinn byrjar að rúlla. Það má rifja upp þegar HM fór fram í Brasilíu 2014, þá voru mótmæli og barist á götum landsins fram á síðasta dag, svo féll allt í ljúfa löt. Það þarf því ekki að koma á óvart ef tónninn breytist þegar mótið hefst fyrir alvöru.“

Hvaða lið verður heimsmeistari?

„Það sem ég held að sé óvenjulegt við þetta mót er að aldrei í sögunni hafi jafn mörg lið getað gert sér vonir um meistaratitil. Ég held það séu alveg 12 þjóðir sem geti mætt á staðinn og gælt við að verða heimsmeistarar. Það er miklu meira en á meðal ári.“

„Það sem veðbankar eru að hallast að, þeir eru að horfa á Suður-Ameríku liðin. Ástæðan er sú að ef við horfum á söguna þá verða Evrópumenn heimsmeistarar þegar mótið fer fram í Evrópu, alla jafnan. Þegar mótið fer fram í öðrum heimsálfum hefur S-Ameríka verið sigursælast.“

„Ég hallast að því að Úrúgvæ muni taka þetta.“

Mun mótið hafa eftirmála fyrir FIFA?

„Það má kannski segja að það hafi þegar gert það. Það er kaldhæðnislegt að Sepp Blatter, sem virtist algjörlega teflon-húðaður og stóð af sér öll spillingarmál. Það sem í rauninni felldi hann var reiðibylgjan eftir að ákveðið var að fara til Katar. Sem er kaldhæðnislegt í ljósi þess að hann var sjálfur ekki hrifinn af þessari ákvörðun og fannst þetta hafa gengið of langt.“

„En ég held engu að síður að FIFA á það mikið undir að þeir munu ekki fara í manngreinarálit eftir sem áður þegar kemur að úthluta stórmótum.“

„Umræða er mjög mismunandi eftir heimshlutum. Þessi umræða á mannréttindanótum, gagnrýni á tímasetningu og þar fram eftir götunum er talsvert bundin við Evrópu og Vesturlönd. Þriðji heimurinn og margir aðrir heimshlutar yppta öxlum og líta svo á að þetta sé bara hroki Evrópubúa sem eru alltaf með stæla þegar mótið er haldið annarsstaðar.“

„Það sem vefst meira fyrir mörgum er tímasetningin. Þetta er í fyrsta sinn sem mótið fer fram á þessum tíma, í nóvember-desember. Hafa verður í huga að það var aldrei ætlunin. Þegar að Katar fékk mótinu úthlutað var það gegn loforði að mótið myndi fara fram á hefðbundnum tíma, gegn loforði um stórkostlegar tæknilausnir sem myndu fela í sér loftkælingu á 50 þúsund manna leikvöngum. Svo munu bara sagnfræðingar framtíðarinnar meta hvort það stóð nokkurn tímann til eða hvort það var falskt loforð sem var sett fram vitandi að það að síðan þyrftum við að bakka og halda mótið á þessum tíma.“