Inn­kalla lyf vegna á­hættu á sýkingum af völdum sýkla­lyfja­ó­næmrar bakteríu

Lyfjastofnun Danmerkur greindi frá því á dögunum að nokkrir sjúklingar sem höfðu fengið sýklalyfið Dicillin frá fyrirtækinu Sandoz hefðu fengið sýkingar af völdum sýklalyfjaónæmrar bakteríu. Tiltekin framleiðslulota lyfsins sem seld var í Danmörku reyndist menguð af bakteríunni, Enterobacter hormaechei.

Sambærilegt lyf er í notkun hérlendis undir heitinu Staklox en það er í hylkjum frá sama framleiðanda. Ákveðið hefur verið að innkalla það þar sem einn einstaklingur hér á landi sem tók lyfið í júlí 2022 fékk sýkingu af völdum sömu bakteríu og greindist í Danmörku.

Frá þessu er greint á vef Landlæknisembættisins og Lyfjastofnunar.

Unnið er að því að rannsaka möguleg tengsl sýkingarinnar á Íslandi við sýkingarnar í Danmörku.

Þeir sem eru að taka Staklox eru beðnir um að skila lyfin í næsta apótek sem fyrst en samheitalyf frá öðrum framleiðanda, Dicloxacillin Bluefish, verður afhent í staðinn fólki að kostnaðarlausu.

Þá eru læknar á Íslandi beðnir um að ávísa á önnur sýklalyf til að viðhalda birgðum af samheitalyfinu, svo sem Keflex.

Eftirfarandi leiðbeiningar er að finna á vef Lyfjastofnunar:

• Ef þú ert núna í Staklox lyfjameðferð, þá skaltu fara með lyfið í apótek. Þú færð í staðinn lyfið Dicloxacillin Bluefish sem er sama lyf og Staklox en frá öðrum framleiðanda. Þú munt fá nægilegt magn til þess að klára sýklalyfjameðferðina samkvæmt leiðbeiningum læknis og þarft ekki að greiða aukalega fyrir það. Þú þarft ekki að hafa samband við lækninn til þess að fá nýja sýklalyfjaávísun til að klára núverandi meðferð.
• Mögulegt er að búið sé að setja lyfið í aðrar umbúðir í apótekinu til þess að koma í veg fyrir að birgðir lyfsins klárist. Ef svo er, þá færð þú fylgiseðil lyfsins útprentaðan með afhentri pakkningu. Fylgiseðilinn má einnig nálgast í sérlyfjaskrá.
• Ef Dicloxacillin Bluefish er ekki fáanlegt í apótekinu, þá er mögulegt að þú þurfir að hafa samband við lækni til að fá nýja sýklalyfjaávísun. Ýmis önnur sýklalyf eru fáanleg.
• Ef þú hefur lokið Staklox meðferð og hefur engin einkenni um sýkingu þarftu ekki að gera neitt. Ef þú hefur fengið einkenni sýkingar, t.d. blöðrubólgu, þá skaltu hafa samband við lækni.

Á vef Landlæknisembættisins segir að ekki hafi verið staðfest að Staklox hylki hafi mengast af bakteríunni sem greindist í Danmörku en ef það kemur í ljós vill embættið benda á eftirfarandi: 

• Bakterían getur í einhverjum tilfellum tekið sér bólfestu í meltingarvegi (sýklun) og orðið hluti af sýklaflóru viðkomandi en ekki er vitað hve oft það gerist.
• Bakterían smitast ekki auðveldlega milli manna við venjuleg samskipti en getur borist á milli manna með náinni snertingu og saur-munn smiti eins og aðrir iðrasýklar.
• Sýklun leiðir ekki sjálfkrafa til sýkingar þar sem mikið af svipuðum bakteríum eru nú þegar í meltingarvegi.
• Sýklar í meltingarvegi geta þó valdið sýkingum, ekki síst þvagfærasýkingum.
• Engar vísbendingar eru um að þessi tiltekna baktería valdi frekar sýkingum en aðrar bakteríur af sömu tegund.
• Prófanir hafa leitt í ljós að þrátt fyrir greint sýklalyfjaónæmi er þessi baktería næm fyrir mörgum öðrum sýklalyfjum og því eru ýmsir meðferðarkostir í boði.
• Mikilvægt er að upplýsa ef einstaklingur hefur tekið mengað Staklox því það hjálpar að velja hentugt sýklalyf ef sýkingar koma upp.
• Mikilvægt er að upplýsa ef einstaklingur hefur tekið mengað Staklox ef hann leggst inn á sjúkrastofnun vegna möguleika á að sýkillinn dreifi sér innan stofnunar.“

Samkvæmt upplýsingum á fylgiseðli er Staklox notað við sýkingum af völdum „penicillínasamyndandi klasasýkla, t.d. við sárasýkingum, ígerðum, beinasýkingum og blóðeitrun.“