Tíu Börsungar náðu tíu stiga forskoti

Barcelona náði tíu stiga forskoti á toppi spænsku úrvalsdeildarinnar í fótbolta er liðið vann 1-0 sigur gegn Valencia í dag, en Börsungar þurftu að spila seinasta hálftímann manni færri.

Það var Raphinha sem kom Börsungum í forystu strax á 15. mínútu leiksins eftir stoðsendingu frá reynsluboltanum Sergio Busquets og staðan var því 1-0 þegar flautað var til hálfleiks.

Heimamenn fengu svo gullið tækifæri til að tvöfalda forystuna af vítapunktinum á 55. mínútu, en spyrna hans hafnaði í stönginni. Aðeins fjórum mínútum síðar misstu Börsungar mann af velli þegar Ronald Araujo fékk að líta beint rautt spjald og liðið þurfti því að leika seinasta hálftíma leiksins manni færri.

Gestunum tókst þó ekki að nýta sér liðsmuninn og niðurstaðan varð því 1-0 sigur Barcelona sem er nú með tíu stiga forskot á toppi spænsku úrvalsdeildarinnar. Liðið er með 62 stig eftir 24 leiki, en erkifjendur þeirra í Real Madrid sem sitja í öðru sæti eiga þó leik til góða.