Síðasta vídeóleigan í bænum lokar dyrunum

Sú var tíðin að finna mátti vídeóleigu á hverju horni á höfuðborgarsvæðinu. Oftar en ekki sjoppur þar sem var hægt að græja sig upp af snakki, bland í poka í litlum grænum pokum, og gosi og um leið leigja vídeóspólur. Ein ný, önnur gömul var tvíhleypa sem margar leigur buðu upp á. Hægt var að leigja myndbandstæki, jafnvel kaupa sér lottómiða og sígarettupakka, sem mun fleiri keyptu þá en nú.

En nú er öldin önnur. Streymisveitur á borð við Netflix, Stöð 2+ og Sjónvarp Símans njóta mikilla vinsælda og enginn þarf að hafa áhyggjur af því lengur að spóla til baka.

Reynir, best þekktur sem Aðal-Reynir, greinir frá tíðindunum á Klapparstíg í færslu á Facebook.

„Jæja elsku bestu viðskiptavinir til margra ára og allir aðrir til sjávar og sveita. Nú er komið að þessu. Aðalvideoleigan…Síðasta kvikmyndaleigan í fullum rekstri á íslandi er að loka núna um næstu mánaðarmót,“ segir Aðal-Reynir.

Gerið mér síðasta greiðann

Frá og með föstudeginum 10. mars verði ótrúlegt úrval DVD-diska til sölu, frá öllum heimshornum og allar gerðir af kvikmyndum.

„Gerið mér nú síðasta greiðann, dreifið þessari tilkynningu og komið til að hjálpa mér að loka, svo að ég komist frá uppsöfnuðu tapi síðustu tveggja ára, svona eins vel og hægt er.“

Það sé hægt með því að kaupa myndir eða gefa í lokunarsjóð. Þá bíður Aðal-Reynir fólki upp á að leggja inn á Aðalfélagið.

„Þessir aurar munu koma hundraðfalt til baka,“ segir Aðal-Reynir og minnir á opnunartímann frá sex um kvöldmatarleytið til hálf tólf um kvöldið bæði föstudag og laugardag. Áður var vídeóleigan ávallt opin frá þrjú á daginn til hálf tólf á kvöldin.

Margir ætla að kíkja í heimsókn

Fjölmargir tjá sig við færslu Aðal-Reynis. Þeirra á meðal Illugi Jökulsson rithöfundur og fjölmiðlamaður.

„Sannarlega tímamót. Síðasta vídeóleigan - og sú langbesta - lokar. Margt í boði,“ segir Illugi.

Gerður Kristný rithöfundur þakkar kærlega fyrir sig og það gerir Þorsteinn Stephensen tónleikahaldari líka.

„Við Svanur komum og kaupum bunch af myndum. Þu ert einstakur, hetja og menningarmógúll. Þin og þinnar búðar verður sárt saknað.“

Þá boðar Þorsteinn J. Vilhjálmsson, ljósvakamaður með meiru, komu sína um helgina.

„Herra minn! Mætum.“

Harðorður í garð þeirra sem hlaða niður ólöglega 

Fram kom í viðtali við Aðal-Reyni í Morgunblaðinu árið 2017 að hann væri með um þrjátíu þúsund titla til leigu. Þar eru margar myndir sem hreinlega hefur verið ómögulegt að nálgast eftir öðrum löglegum leiðum.

Kvikmyndir frá öllum heimshornum, eldgamlar sem glænýjar. Hann sagði samkeppnina við streymisveitur eðlilega og heiðarlega. Hins vegar væri ólöglegt niðurhal eitthvað annað og verra. Þar töpuðust miklar tekjur í gegnum útleigu og sömuleiðis skattar. 

Þá sagði Reynir að erlendir ferðamenn kæmu margir við í leigunni. Ekki til að leigja sér spólu heldur frekar til að skoða leiguna, eins og um safn væri að ræða.