Vinkonur og vinna: „Þetta er ekkert ólíkt því að eiga maka í vinnunni!“

Umræðuefnið eru vinir í vinnunni, sem samkvæmt niðurstöðum nýlegrar Gallup könnunar sýna að hafa margvísleg jákvæð áhrif á fólk. Til dæmis velgengni, starfsánægju og hollustu þeirra við vinnustaðina.

„Já þetta var ótrúlegt. Að kynnast Erlu var eins og að hitta sálufélaga sinn,“ segir Kristjana Kristjánsdóttir mannauðsráðgjafi hjá Sjúkrahúsi Akureyrar og skellir líka upp úr.

Því Erla og Kristjana eru bestu vinkonur.

Sem vinna saman.

Í gær og í dag fjallar Atvinnulífið um vini og vinkonur í vinnunni og þau áhrif sem vinskapur í vinnu getur haft á fólk og líðan.

Ekki búnar að þekkjast eins lengi og fólk heldur

Erla er fædd árið 1982, á mann og fjögur börn og hefur meira og minna búið á Akureyri frá því um tvítugt. Erla hefur starfað á Sjúkrahúsi Akureyrar (SAk) frá því árið 2004, þar af lengi sem hjúkrunarfræðingur og verkefnastjóri á upplýsingatæknideild SAk en eins sem verkefnastjóri rafrænnar sjúkraskrár fyrir Embætti Landlæknis.

Kristjana er fædd árið 1978, er gift og á þrjár dætur . Hún hefur líka búið á Akureyri frá því hún var í framhaldsskóla. Hún hefur starfað sem mannauðsráðgjafi hjá SAk síðan árið 2021 og það var því forveri Erlu sem réði hana til starfa.

„Það halda margir að við Erla höfum þekkst mikið lengur en við höfum gert. Margir hvá við þegar þeir heyra hvað það er stutt síðan við kynntumst“ segir Kristjana þegar hún útskýrir hversu nánar vinkonur þær eru og hvernig vinskapurinn fer ekki framhjá neinum.

„Sem er auðvitað ótrúlega dýrmætt því það að eignast svona góða vinkonu svona seint er ekkert endilega eitthvað sem maður býst við að gerist. Flestir vinir manns ná lengra aftur í tímann,“ segir Erla.

Í markþjálfuninni árið2017 smullu þær hins vegar strax saman og svo vel vildi til að báðar fóru í meistaranám á sama tíma fljótlega á eftir.

„Þá jókst samvera okkar enn meira og við grínuðumst einmitt oft með það hvað það yrði frábært að vinna saman!“ segir Kristjana og Erla kinkar brosandi kolli.

Það er afar stutt í hláturinn og gleðina hjá þeim stöllum.

Enda gera þær margt saman utan vinnu. Gönguskíði, gönguferðir, matarboð og fleira.

„Mennirnir okkar eru orðnir góðir vinir líka sem er mjög skemmtilegt. Þeir eru reyndar alltaf að reyna að fá okkur til að tala minna um vinnuna,“ segir Erla og Kristjana bætir við: „Þá þeir reyna með því að jarðtengja okkur aðeins en síðan líður alltaf smá tími og þá heyrast þeir segja: Jæja, nú eru þær farnar af stað aftur…“

Því auðvitað gleyma þær sér oft og fara að tala um vinnuna aftur og aftur. Enda segja þær vinnustaðinn svo skemmtilegan þótt mörg verkefnanna séu krefjandi.

Að eiga vin í vinnunni

Erla og Kristjana segjast sammála því sem niðurstöður kannana segja um margvísleg jákvæð áhrif þess að eiga góðan vin í vinnu.

„Það veitir manni rosalega mikið öryggi að hafa vinkonu í vinnunni sem maður treystir 100%. Þegar að við byrjuðum að vinna saman þá var Covid og álagið alveg sérstaklega mikið. Að geta deilt með vinkonu sinni alls konar hugleiðingum og samtölum hefur verið ótrúlega gott. En í samtölunum okkar höfum við alltaf lagt mjög mikla áherslu á hreinskilni og eigum sem betur fer báðar mjög auðvelt með að vera mjög hreinskilnar við hvor aðra, og reyndar allaf. Sem endurspeglar líka hið fullkomna traust sem ríkir okkar á milli,“ segir Erla.

Kristjana tekur undir með Erlu og bætir við:

Í vinnunni erum við fyrst og fremst faglegar. En það er mjög góð tilfinning að geta alltaf rætt saman hreinskilnislega, vitandi að við getum treyst á hvor aðra. 

Auðvitað eigum við oft erfitt með að aðskilja vinnuna frá einkalífi þegar við erum ekki að vinna en erum saman sem vinkonur. 

En ég myndi ekki vilja hafa þetta öðruvísi.“

Í janúar árið 2022 tók Erla síðan við yfirmannastöðu mannauðs, færðist frá því að vera mannauðsráðgjafi í að vera mannauðsstjóri.

Hefur það breytt einhverju að nú er önnur ykkar yfirmaður hinnar?

„Nei það held ég ekki,“ segir Erla og bætir við:

„Enda lít ég ekki á hlutverkið mitt beint sem yfirmann heldur frekar að ég beri ábyrgð sem stjórnandi en hlutverkið mitt sé að vera leiðtogi þar sem ég nálgast mitt samstarfsfólk á jafningjagrunni. Teymið okkar vinnur afar náið saman, við leggjum mikla áherslu á gagnkvæma virðingu og gleði og eflaust hjálpar það líka til að Kristjana er staðgengillinn minn þannig að gagnvart öðrum í teyminu er eðlilegt að við séum oft að vinna mjög náið saman.“

„Mér finnst það ekki hafa breytt neinu vinskapslega séð að Erla sé yfirmaður minn. Ef eitthvað er, myndi ég frekar telja að það væri meiri áskorun fyrir hana heldur en mig. Í vinnunni held ég líka að við séum ekkert að líta á okkur sérstaklega sem vinkonur, við erum faglegar í okkar störfum en svo heppnar að geta speglað okkur í hvor annarri, við erum svo líkar.“

Þá segir Erla mikilvægt að hafa í huga að í dag þýði stjórnendastarf ekki aðeins yfirmannastarf sem hefur einhvers konar boðvald yfir öðrum. Nútímastjórnun feli í sér að starfsfólk setji ekkert síður kröfur á sinn yfirmann heldur en yfirmaðurinn á starfsfólk.

„Ég þráði að hitta hana…“

Erla og Kristjana segjast sannfærðar um að góður vinskapur í vinnu hafi ótrúlega marga góða kosti. Starfsánægja sé meiri, líðanin betri og tilhlökkun til vinnunnar.

„Núna var Erla til dæmis að koma úr fríi og ég get alveg viðurkennt það að ég nánast þráði að hitta á hana þegar hún kom heim,“ segir Kristjana.

Því eins og góðum vinkonum sæmir, er löngunin til samvista og samtals alltaf ríkulega til staðar.

Að eiga góðan vin þýðir að maður á líka auðveldara með að þora að vera maður sjálfur. Og það er dýrmætt að geta verið það því þá þorir maður að vera berskjaldaður. 

Ég viðurkenni það alveg að hafa svo sem ekki spáð mikið í hversu jákvæð áhrif vinskapur í vinnu hefur, fyrr en ég kynnti mér niðurstöður könnunarinnar. 

En klárlega gerir það vinnuna skemmtilegri að eiga góðan vin í vinnunni,“ 

segir Erla og bætir við:

„Þér finnst þú öruggari, getur rætt allt, ert alltaf viss um að hverju þú gengur, endurgjöfin er líka dýrmæthvort sem hún er jákvæð eða neikvæð, þá færðu hana frá góðum vini. Sem er gott því traustið er til staðar og endurgjöf er alltaf gjöf.“

„Mér finnst það í rauninni valdeflandi og mjög uppbyggjandi að eiga góðan vin í vinnunni sem maður treystir vel. Þú átt þitt skjól og þorir að berskjalda þig. Vinskapur í vinnu er því svo dýrmætur á marga vegu,“ segir Kristjana og bætir hlæjandi við:

„Þetta er ekkert ólíkt því að eiga maka í vinnunni!“