Tímabilið hugsanlega búið hjá Stefáni

Stefán hefur verið úrskurðaður í þriggja leikja bann af aganefnd HSÍ. Hann hlaut tvær útilokarnir með skýrslu vegna framkomu sinnar eftir leik Hauka og Gróttu í Olís-deild karla. Hegðun hans var lýst sem „mjög ódrengilegri“.

Í úrskurði aganefndar segir að við ákvörðun refsingar hafi verið litið til þess að um tvö aðskilin brot hafi verið að ræða. Þá var sú staðreynd að Stefán hefur áður verið dæmdur í bann á tímabilinu leitt til stighækkunar refsingarinnar.

Stefán missir af síðustu þremur leikjum Hauka í Olís-deildinni og ef liðið kemst ekki í úrslitakeppnina er tímabilinu lokið hjá hornamanninum knáa.

Haukar eru í 8. sæti deildarinnar með nítján stig, tveimur stigum á undan Gróttu. Haukar kærðu framkvæmd leiks liðanna í síðustu viku. Honum lauk með eins marks sigri Seltirninga, 27-28.

Haukar virtust hafa komist yfir þegar örfáar sekúndur voru eftir en Birgir Steinn Jónsson skoraði í kjölfarið fyrir Gróttu og leikmenn liðsins fögnuðu því sem flestir héldu að væri jafntefli.

Í ljós kom hins vegar að annar dómari leiksins hafði dæmt línu á Stefán þegar hann kom knettinum í netið í sókninni á undan á meðan hinn dómarinn dæmdi mark. Eftir töluverða reikistefnu var niðurstaðan að mark Hauka var dæmt af en mark Gróttu látið standa.

Ljóst er að úrskurður í þessu máli gæti haft mikil áhrif á það hvort Haukar eða Grótta komast í úrslitakeppnina. Næsti leikur Hauka er gegn Val á laugardaginn. Sama dag mætir Grótta ÍBV.