Vatnhamar í Víking úr Víkingi

Gunnar kemur til með að fylla skarð Kyle McLagan eftir að sá síðarnefndi meiddist illa, en Víkingur greindi frá félagsskiptunum á samfélagsmiðlum sínum fyrr í dag. Leikmaðurinn verður þó ekki kynntur formlega fyrr en í lok vikunnar.

Vísir greindi frá því í morgun að færeyskir fjölmiðlar hefðu greint frá félagsskiptunum, en nú hefur Víkingur staðfest fréttirnar.

Gunnar er færeyskur landsliðsmaður sem á að baki 29 leiki fyrir þjóð sína. Hann er reynslumikill leikmaður sem hefur spilað 259 leiki fyrir Víking í Götu og skorað í þeim 43 mörk, ásamt því að hafa lagt upp önnur 15, sem verður að teljast fínasta tölfræði fyrir varnarmann.