Börn með markað í Skrúfunni á Eyrarbakka

Það er Skrúfan, grósku og sköpunarmiðstöð á Eyrarbakka, sem stendur að viðburðinum en um 30 börn víða að munu mæta á markaðinn og selja varning frá sér. Gestum gefst kostur á að styrkja fjögur góðgerðasamtök sem tengd eru börnum en það er Umhyggja, Barnaspítali hringsins, Barnaheill og Ljónshjarta.

Berglind Björgvinsdóttir frá Skrúfunni er í forsvari fyrir barnamarkaðinn sem stendur frá 11:00 til 17:00 á morgun.

„Dóttir mín byrjaði á því að spyrja mig hvort hún mætti selja leikföngin sín og listaverk, hún er mikil föndurkona og henni langaði að fá að selja listaverk og ég átti að bjóða fólki í Skrúfuna en svo vatt þetta upp á sig og varð að einum stórum markaði,” segir Berglind og bætir við.

„Sum börn ætla að selja handverk, sem þau eru búin að gera, perl og listaverk. Önnur börn ætla að selja gömul leikföng en margir eru búnir að vera að taka til hjá sér af því að það er mikil aðsókn á markaðinn því það eru um 30 börn að taka þátt.”

En fyrir þau, sem ekki vita, hvar er Skrúfan á Eyrarbakka er, hvar er hún til húsa?

„Skrúfan er staðsett á Hafnarbrú 3. Það eru þrjár innkeyrslur á Eyrarbakka. Frá Selfossi ef maður keyrir þaðan, þá kemur fyrst beygjan inn að Litla Hrauni, önnur beygjan er inn í þorpið og þetta er þá þriðja beygjan, alveg á endanum næst Þorlákshöfn og svo er þetta fyrsta húsið til hægri,” segir Berglind.

Þá má geta þess að forseti Íslands, Guðni Th. Jóhannesson hefur boðið komu sína á barnamarkaðinn á morgun á Eyrarbakka, sem er frá 11:00 til 17:00.