Ástar-haturs sam­band við Reykja­vík varð að lagi

Lagið má heyra í spilaranum hér fyrir neðan:

Ömurlegt en samtímis inspírerandi

Einar segir þó gott að búa í Reykjavík og flest af því góða taki maður sem gefnu.

„Svo eru óteljandi atriði sem maður staldrar svo oft við og svekkir sig á. Veðráttan, almenningssamgöngur, öll gráu húsin, allt þetta kaotíska. En á hinn bóginn er ég bundinn Reykjavík svo sterkum böndum þar sem flestallt sem er mér kært fyrirfinnst þar, flestallar af mínum bestu minningum urðu til þar.

Að sitja fastur í bíl í Ártúnsbrekkunni eða krókna úr kulda í strætóskýli er ömurlegt en samtímis inspírerandi. Þess konar pirringur er frábær kraftur til að knýja áfram skrif. 

Ég reyni að vinna á þeim nótum í skáldskapnum líka, ég reyni að snúa upp á hversdagsleikann með einhverjum hætti sem vekur forvitni.“

Einar hefur búið í Uppsölum í Svíþjóð undanfarin þrjú ár ásamt fjölskyldu sinni en þau flytja aftur til landsins í næsta mánuði.

„Þá munum við skjóta rótum í Reykjavík. Það gefur útgáfunni á þessu Reykjavíkurlagi örlítið aukakrydd.“

Svíþjóð hafði þó einnig mótandi áhrif á lagið.

„Að komast allt í einu í kynni við fullt af skemmtilegri sænskri tónlist og ferska textagerð ásamt heimþrá urðu til þess að ég rak smiðshöggið á lagið hér úti í Svíþjóð.“

Prins Póló mikill áhrifavaldur

Viðlagið við Reykjavík, ó, Reykjavík kom fyrst til Einars árið 2018.

„Þá hafði ég búið úti á landi í nokkra mánuði og var farinn að sakna borgarinnar. Ég mætti í bæinn, það var kyrrt veður en samt svo þungbúið, hús eins og BSÍ gjörsamlega að gera sitt besta við að vera ljótt, og þá spratt fram þessi hugsun: Ég elska þig, Reykjavík – eða svona næstum því.

Þetta sumar bjó ég ásamt konunni minni hjá Berglindi Häsler og Svavar Pétri Eysteinssyni heitnum, Prins Póló. 

Svavar er einn af áhrifavöldum þess að ég ákvað að gefa út tónlist aftur undir eigin nafni. 

Hann var mér frábær fyrirmynd, að fylgjast með honum kýla á það sem hann hafði ástríðu fyrir og ekki síður textarnir hans fengu mig til að hugsa: Já, ég vil gefa út meiri tónlist.“

Einar hefur verið viðloðinn tónlist í langan tíma en í ár er áratugur liðinn frá því að hann sendi frá sér sólóplötuna Tímar án ráða. Í millitíðinni hefur hann gefið út tvær bækur og samið texta fyrir aðra listamenn á borð við Jóhönnu Guðrúnu, Helga Björns og Jón Jónsson.

„Sem dæmi má nefna lögin Gefðu allt sem þú átt og Ef ástin er hrein. Ef ástin er hrein var einmitt valið lag ársins á Hlustendaverðlaununum 2022 en þann texta sömdum við Jón saman,“ segir Einar.

Í spilaranum hér fyrir neðan má heyra GDRN og Jón Jónsson flytja lagið Ef ástin er hrein á Hlustendaverðlaununum 2022:

Reykjavík, ó, Reykjavík var tekið upp í Gula Studion í Malmö af Arnari Guðjónssyni sem útsetti líka lagið, spilaði á öll hljóðfærin og hljóðblandaði. 

„Það eru forréttindi að vinna með slíkum þúsundþjalasmið,“ segir Einar að lokum. Hér má hlusta á tónlist Einars á streymisveitunni Spotify.