Fulltrúar fjórðungs fullvalda ríkja heims á leið til Reykjavíkur

Stór hluti þjóðarleiðtoganna mun lenda á Reykjavíkurflugvelli. Til að minnka kolefnissporið ætla margir að deila flugvél. En einhvern veginn þarf að koma þeim öllum til skila niður í Hörpu og til þess bíður stór bílafloti á flugvellinum.

„Það hefur verið í mörg horn að líta í skipulagningunni. Við höfum leigt fjöldan allan af bílum. Erum búin að leigja 42 bíla undir leiðtogana. Nýtum svo bíla sem stjórnarráðið á undir rest. Síðan erum við með ýmsa bíla frá bílaleigum sem eru undir sendinefndir,” segir Ragnar Þorvarðarson sem er framkvæmdastjóri fundarins í utanríkisráðuneytinu.

Þess sjást víða merki í Reykjavík að það styttist í leiðtogafund Evrópuráðsins í Hörpu í næstu viku. Þannig hefur eftirlitsmyndavélum í borginni verið fjölgað og umferð um stóran hluta miðborgarinnar verður takmörkuð strax klukkan 23 á mánudagskvöld, kvöldið fyrir upphaf fundarins. Leiðtogarnir koma á mismunandi tímum, flestir fyrripart þriðjudags.

„Áhersla hefur verið lögð á að nýta hverja mínútu. Það er ekki á hverjum degi sem þessir leiðtogar koma saman í eigin persónu. Þau munu sitja saman og ræða krefjandi mál, meðal annars tengd Úkraínu á fyrri deginum,“ segir Ragnar.

Auk þess ávarpa leiðtogarnir allir opnunarathöfn í Eldborg. Á seinni deginum verður síðan stór sameiginlegur fundur og fimm fundir þar sem leiðtogunum verður skipt í hópa. Þeir munu einnig nýta tækifærið til tvígliða funda.

„Þar sem forsetar og forsætisráðherrar frá tveimur mismunandi ríkjum setjast niður og ræða saman um þau mál sem brenna á þeim,“ segir Ragnar.

Nú er staðfest að 40 leiðtogar og fimm utanríkisráðherrar fyrir hönd sinna leiðtoga mæta á fundinn, ásamt fultrúum fimm áheyrnarríkja og leiðtogum Evrópusambandsins. Samtals sextíu sendinefndir.

„Með þessum fimmtíu ríkjum sem eru að koma hingað verða hér á Íslandi í næstu viku fulltrúar fjórðungs allra aðildarríkja Sameinuðu þjóðanna. Fjórðungs allra fullvalda ríkja í heiminum,“ segir Ragnar Þorvarðarson.