Þorgils til Svíþjóðar og fær sendingar frá Ólafi

Þorgils hefur tekið þátt í mikilli velgengni Valsmanna síðustu ár sem línu- og varnarmaður, en mun spila í sænsku úrvalsdeildinni á næstu leiktíð.

Karlskrona vann sig upp úr næstefstu deild nú í vor og hyggst blása til sóknar í efstu deild. Félagið verður með tvo Íslendinga því áður hafði félagið samið við stórskyttuna og landsliðsmanninn Ólaf Guðmundsson sem snýr aftur til Svíþjóðar frá Sviss í sumar.

Þorgils er 25 ára gamall. Á heimasíðu Karlskrona er honum lýst sem harðskeyttum varnarmanni sem sé fljótur að snúa vörn í sókn.

„Við erum ánægð með að geta tekið á móti Þorgils. Hann hefur staðið sig mjög vel bæði í íslensku deildinni og í Evrópudeildinni og við teljum að hann verði góð viðbót við okkar lið. Almennt séð eru íslenskri leikmenn tilbúnir að æfa stíft, tilbúnir að berjast fyrir öllu og með góðan grunn,“ segir Tobias Karlsson, íþróttastjóri Karlskrona, á heimasíðu félagsins.

„Það er mjög ánægjulegt að skrifa undir til tveggja ára hjá Karlskrona,“ segir Þorgils. „Það var kominn tími til hjá mér að yfirgefa Ísland og það eru spennandi hlutir í gangi hjá Karlskrona. Upplifun mín af félaginu hefur verið mjög góð og það að Ólafur verði með hérna gerði ákvörðunina auðvelda. Ég hlakka til að klæðast svörtu treyjunni og berjast fyrir stigum í Karlskrona,“ sagði Þorgils.