Strákarnir sem spila fyrir Ísland á EM: Tveir lykilmenn ekki með

Sindri Sverrisson skrifar 6. júní 2023 10:48

Kristian Nökkvi Hlynsson er leikmaður hollenska stórliðsins Ajax og átti stóran þátt í að koma U19-landsliðinu á EM. VÍSIR/HULDA MARGRÉT

Ólafur Ingi Skúlason hefur nú valið þá leikmenn sem fara á Evrópumót U19-landsliða karla í fótbolta, á Möltu um næstu mánaðamót.

Eins og Vísir greindi fyrst frá eru tveir bestu leikmenn íslenska liðsins ekki með, þeir Kristian Nökkvi Hlynsson og Orri Steinn Óskarsson. Ajax og FC Kaupmannahöfn, félögin sem leikmennirnir spila fyrir, gáfu ekki leyfi fyrir því að þeir færu á mótið en UEFA setur ekki þá skyldu á félög að leyfa leikmönnum að spila á EM U19-landsliða. Kristian er hins vegar í A-landsliðshópnum fyrir leikina við Slóvakíu og Portúgal í júní.

Fjórir leikmenn íslenska hópsins eru á mála hjá erlendum félögum. Þetta eru markvörðurinn Lúkas J. Blöndal Petersson úr Hoffenheim, Daníel Freyr Kristjánsson úr Midtjylland, Daníel Tristan Guðjohnsen úr Malmö og Hilmir Rafn Mikaelsson úr Tromsö.

Stjarnan með fimm menn í hópnum

Stjarnan á flesta leikmenn í hópnum eða fimm talsins. Grótta á tvo. Breiðablik, Keflavík, Þór, Víkingur, Fjölnir, ÍA, Valur, FH, KR og Selfoss eiga svo einn fulltrúa hvert.

Íslenski hópurinn heldur af landi brott 30. júní og spilar sinn fyrsta leik á EM gegn Spáni 4. júlí. Liðið er einnig í riðli með Noregi og Grikklandi. Riðlakeppninni lýkur 10. júlí og fara tvö efstu liðin þá í undanúrslit.

Íslenska liðið vann meðal annars England á leið sinni inn á EM.Getty/Matt McNulty

Ísland komst í lokakeppnina með því að vinna sinn milliriðil í undankeppninni, á Englandi í lok mars. Þar vann liðið ríkjandi meistara Englands og Ungverjaland, og gerði jafntefli við Tyrkland. Orri Steinn skoraði þrjú marka Íslands í milliriðlinum, Kristian Nökkvi eitt og Hilmir Rafn Mikaelsson eitt.

EM-hópur Íslands:

Adolf Daði Birgisson Stjarnan

Arnar Daníel Aðalsteinsson Grótta

Arnar Númi Gíslason Grótta

Ágúst Orri Þorsteinsson Breiðablik

Ásgeir Orri Magnússon Keflavík

Bjarni Guðjón Brynjólfsson Þór Ak.

Daníel Freyr Kristjánsson FC Midtjylland

Daníel Tristan Guðjohnsen Malmö FF

Eggert Aron Guðmundsson Stjarnan

Gísli Gottskálk Þórðarson Víkingur R.

Guðmundur Baldvin Nökkvason Stjarnan