Ó­bæri­legur létt­leiki stjórnar­sam­starfsins í upp­námi

Orð Bjarna hafa vakið mikla athygli og jafnvel reiði. Þannig sendi Jódís Skúladóttir þingmaður Vinstri grænna, samstarfsfólki sínu í meirihlutanum kaldar kveðjur í kjölfarið. Sagði innanmein Sjálfstæðisflokksins átakanleg á að horfa. 

„Til að víkja athygli þjóðarinnar frá þessum darraðadansi og til að bregðst við fylgistapi, sameinast þau nú öll í að velta sér upp úr rasíska drullupollinum í von um að geta kroppað inn einhver prósent frá systurflokkum sínum í útlendingamálum, Miðflokki og Flokki fólksins,“ skrifaði Jódís í pistli á Facebook sem vakið hefur mikla athygli og verið hafður meðal annars til marks um að það hrikti í stjórnarsamstarfinu. 

En þó margir Sjálfstæðismenn hafi móðgast þegar Jódís birti þessi skrif er ekki víst að það sé nema í  nösunum á þeim.

Þorsteinn telur samstarfið í ríkisstjórninni vissulega þrotnað en eigi ekki að koma á óvart. Það hafi beinlínis verið uppleggið. „Samstarf um ríkisstjórn með raunverulega stefnu hefði vissulega kostað erfiðar málamiðlanir. En þingmenn sjálfstæðismanna völdu sjálfir gagnkvæmt neitunarvald og útideyfu með VG. Þeir bera ábyrgð á því vali gagnvart kjósendum í komandi kosningum,“ skrifar Þorsteinn í pistli sem hann birtir á Eyjunni.

Veruleikaflótti Bjarna

Þorsteinn vísar til orða Guðmundar Inga Guðbrandssonar, varaformanns VG, sem sagði á fundi á Ísafirði í fyrra að hlutverk VG í ríkisstjórn væri ekki síst fólgið í því að stöðva hugmyndafræði Sjálfstæðisflokksins. Þetta sé því raunveruleg pólitísk tilveruklípa sem þingflokkurinn sé búinn að koma sér í.

Hvað varðar orð Bjarna um að ástandið í útlendingamálum sé orðið stjórnlaust segir Þorsteinn að í full tíu ár hafa sex dómsmálaráðherrar úr röðum sjálfstæðismanna borið ábyrgð á málefnum innflytjenda. Og að í byrjun vikunnar hafi sjöundi ráðherrann tekið við þessari ábyrgð.

„Af því tilefni sagði fjármálaráðherra að við hefðum algjörlega misst tökin á þessum málum. Bæjarstjórinn Hafnarfirði svaraði því til í Kastljósi að þessi þungi áfellisdómur væri sjálfsgagnrýni. Það eru orð að sönnu. Fá dæmi eru um að forystumenn í stjórnmálum hafi gengist með svo afgerandi hætti við mistökum eftir að hafa borið ábyrgð á málaflokki samfellt í áratug,“ skrifar Þorsteinn. Hann spyr hver sé sökudólgurinn og svarar þeirri spurningu sjálfur:

„Fjármálaráðherra staðhæfði í viðtali á RÚV að þingið hefði brugðist. Stærsti flokkurinn í þremur ríkisstjórnum með ábyrgð á innflytjendamálum allan tímann má vissulega nota stór orð um lausatök. Hitt lýsir veruleikaflótta að skrifa þau á minnihlutann á Alþingi.“

Pólitískur skollaleikur formanns Sjálfstæðisflokksins

Þorsteinn segir að Bjarna skulda svar við því hvaða samstarfsflokkur í þremur ríkisstjórnum hafi komið í veg fyrir að sex dómsmálaráðherrar Sjálfstæðisflokksins næðu árangri í þessum málaflokki. Jón Gunnarsson fráfarandi dómsmálaráðherra hafi hins vegar verið skýr um þetta. Hann segi sem er að vandi Sjálfstæðisflokksins sé samstarfið við VG.

„Öllum má vera ljóst að pólarnir í stjórnmálum geta ekki til lengdar náð saman um markvissa stefnu. Jón Gunnarsson segir bara satt um þá staðreynd. 

Aðrir reyna að loka augunum eða draga athyglina að öðru. Forsætisráðherra reynir að loka augunum með því að mæla útideyfu bót á öllum helstu málasviðum. Fjármálaráðherra reynir á hinn bóginn að draga athyglina frá útideyfu samstarfsins með því að koma umræðu um málefni útlendinga á Pírataplan með öfugum formerkjum.“

Þorsteinn segir að slíkur skollaleikur með pólitísku ábyrgðina breyti ekki hinu að við höfum ekki fulla stjórn á þróun útlendingamála. Og að á þeim vanda þurfi að taka málefnalega en ekki með sleggjudómum.

Mat Þorsteins er þannig að ríkisstjórnarsamstarfið sé vængbrotið og ekki um neitt sem ætti að vera uppi á borðum ríkisstjórnar til úrlausnar.

Sýndarágreiningur stjórnarflokkanna

Við þetta sem sagt er um ástir ósamlyndra hjóna varðandi útlendingamálin bætist svo afar umdeild ákvörðun Svandísar Svavarsdóttur matvælaráðherra að stöðva með nánast engum fyrirvara hvalveiðar. Sú ákvörðun stendur í Sjálfstæðismönnum og þeir þingmenn sem Vísir hefur rætt við eru reiðir. 

Boðað hefur verið til þingflokksfundar Sjálfstæðisflokksins þar sem það mál verður tekið fyrir. Óli Björn Kárason þingflokksformaður flaug til landsins í gærkvöldi frá London. Þingflokkur Sjálfstæðisflokkurinn þarf á fundi sínum að svara spurningunni: Eru þau í ríkisstjórn til að stöðva hugmyndafræði VG? Það má heita öfugsnúin staða.

Þannig ætti að liggja fyrir að nú reynir sem aldrei fyrr á ríkisstjórnarsamstarfið. En svo er spurningin hvort þetta sé allt í plati? Varaþingmaður Samfylkingarinnar, Guðmundur Andri Thorsson, telur að límið sem heldur því saman sé ekki að gefa sig. Þvert á móti séu ágreiningurinn allur á yfirborðinu og þjóni öðrum tilgangi en þeim sem liggur í augum uppi. Hann býður vinum sínum á Facebook upp á athyglisverða greiningu:

„Þessa dagana hefur verið ýtt af stað markvissu átaki ríkisstjórnarflokkanna að ná til sín fylgi sem þeir hafa misst. Það gera þeir með því að ydda ágreiningsmál, sem vænleg eru til að vekja tilfinningar kjósenda. Útlendingamál og hvalveiðar,“ skrifar Guðmundur Andri á sína Facebook-síðu.

Þær væringar séu því meira sem leikþáttur en nokkuð annað; „sem ýtir undir þá falshugmynd að þessi ríkisstjórn spanni átakalínur íslenskra stjórnmála. Það gerir hún ekki.

Það ríkir þvert á móti eindrægni og sátt við ríkisstjórnarborðið um fyrirkomulag efnahagsmála, biðlista í fjársveltu heilbrigðiskerfi, skerðingar lífeyris, varðstöðu um landbúnaðarkerfi, krónuhagkerfi, okurvexti og verðbólgu, gjafakvóta og misskiptingu.“