Hrasaði við Háafoss

Boð barst björgunarsveitum í uppsveitum Árnessýslu klukkan 17:24 en þegar björgunarfólk kom fyrst á staðinn var ljóst að hinn slasaði var staðsettur innarlega í gili við fossinn og því erfitt að ná honum þaðan út.

Þetta kemur fram í tilkynningu frá Slysavarnafélaginu Landsbjörg en í kjölfarið voru allar björgunarsveitir í Árnessýslu boðaðar út til aðstoðar og reynt að fá þyrlu frá Landhelgisgæslunni.

Búið var um sjúklinginn á börum og hann fluttur fram gilið og kom þyrla á svæðið um klukkan 19:40, að sögn Landsbjargar. Eftir undirbúning var sjúklingur hífður upp í þyrluna 19:55 og fluttur á sjúkrahús. Lauk aðgerðum á staðnum upp úr 20:00 og hélt björgunarfólk heim.