Hraun­rennslið nú al­farið neðan­jarðar

Þetta kemur fram í til­kynningu frá Eld­fjalla-og náttúru­vá­r­hópi Suður­lands. Þar kemur fram vestan við gíginn sé nú myndar­leg hraun­tjörn sem nærist af hægu inn­rennsli í gegnum göng sem tengjast beint í gíg­skálina.

Sunnan við gíginn er tekið að myndast til­tölu­lega slétt hellu­hraun ofan á úfnara hrauni. Undan storknuðu hellu­hrauninu er hraun­bráð að brjótast fram á fjöl­mörgum stöðum og er það til marks um að net hraun­rása neðan­jarðar sé að myndast og þróast. Haldist gosið á­fram stöðugt má búast við að þessi þróun haldi á­fram og að hraun­rásir neðan­jarðar muni veita hrauninu langar leiðir frá gígnum.

Fram­vinda hellu­hrauns er al­mennt mun hægari en úfnara apal­hrauns. Þetta sást vel í gosinu í Geldinga­dölum 2021 þar sem hraun­jaðarinn skreið oftar en ekki fram yfir sem úfið karga­hraun, en á seinni stigum var hið úfna hraun hulið sléttu hellu­hrauni.

Á morgun eru tvær vikur frá því að gosið hófst. Gos­ó­rói síðast­liðna viku hefur verið merki­lega stöðugur, fyrir utan stök og tíma­bundin frá­vik þegar breytingar hafa orðið á sjálfum gígnum.