Raðaði saman kramda íþróttahjartanu og náði markmiðum sínum

Heimsmeistaramótið í hálfum járnkarli fer fram í Lahti í Finnlandi um helgina. Tveir Íslendingar eru á meðal keppenda, Íslandsmethafinn Hjördís Ýr Ólafsdóttir og Sædís Björk Jónsdóttir. Sú síðarnefnda tryggði sér sæti á HM með því ná sínum besta tíma á móti í Danmörku í júní. Hún kom þá í mark á 4:59,57 mínútum og kláraði hálfan járnkarl þar með í fyrsta sinn á undir fimm klukkutímum. Í hálfum járnkarli hjóla keppendur 90 km, synda 1,9 km og hlaupa 21,5 km, eða hálft maraþon.

Sædís segir að það hafi verið sérstaklega sætt að ná því að komast inn á HM eftir afar erfitt ár í fyrra.

„Það stemmdi allt í það að 2022 yrði mitt allra besta ár og ég hafði svo miklar væntingar fyrir því keppnistímabili. Ég fór í mína A keppni í lok júní 2022 og klúðraði öllum mínum markmiðum. Ég lenti á þvílíkum vegg sem ég náði ekki að koma mér uppúr og ég get ekki sagt neitt annað en að það hafi gjörsamlega kramið í mér íþróttahjartað,“ sagði Sædís í samtali við Vísi.

Sex vikum seinna keppti Sædís á móti í Þýskalandi þar sem hún var hreinlega hætt komin.

„Í byrjun þeirrar keppni, í sundinu, fékk ég högg á höfuðið og rotaðist. Sem betur fer tóku starfsmennirnir úti í vatninu eftir því að ég lá meðvitundarlaus í því og ég rankaði svo bara við mér í bát. Keppninni var því lokið hjá mér,“ sagði Sædís.

Gekk nærri sér

Henni fannst hún ekki lokið tímabilinu 2022 svona og lagði allt undir til að geta keppt á síðasta móti ársins.

„Ég vildi gefa mig alla í þá keppni en líkaminn var ekki alveg á sama máli og þurfti meiri hvíld. Ég ýtti ábygglega alltof mikið á hann og reyndi að æfa eins og ég gat, sem var samt ekki það mikið. En líkaminn er magnaður og ég komst í heilu lagi í gegnum þá keppni með ágætis árangri,“ sagði Sædís sem þurfti þó að borga brúsann fyrir allt sem hún hafði lagt á sig.

„Líkaminn fékk nóg eftir það og nokkrum dögum eftir keppnina seinna fékk ég þær fréttir að ég hafi fengið bráða nýrnabilun og við tóku þá nokkrar vikur þar sem ég lá rúmliggjandi og gat lítið sem ekkert borðað,“ sagði Sædís. Þessi þrautaganga markaði kaflaskil á ferli hennar.

Tapið særir meira

„Eftir þetta allt saman setti ég framan á símann minn „It hurts more to lose“ sem er tilvitnun í hinn fræga þríþrautarkappa Kristian Blummenfelt. Ég er búin að stara á þessa tilvitnun framan á símanum mínum í heilt ár, bíðandi eftir þessu keppnistímabili,“ sagði Sædís.

„Að komast í mark í ár, klára á undir fimm klukkutímum og fá sæti á HM sem hefur verið draumurinn síðan ég byrjaði að keppa færði mér hlýju í hjartað. Að fórna svona ótrúlega miklu til að gefa sig 120 prósent í fjarlægan draum og sjá svo að öll sú vinna skilaði sér litar tilveruna í glænýjum litum.“

Sædís hefur dvalið í Finnlandi undanfarnar vikur til að undirbúa sig sem best fyrir HM um helgina.

„Ég hef verið hérna seinustu fimm vikur, bæði til að venjast landinu og veðrinu og hafa nægan tíma til að fara brautina. Ég vildi koma hingað út og hafa nægilegan tíma til að skanna svæðið og kynna mér aðstæður,“ sagði Sædís.

„Undirbúningurinn hefur gengið vel. Það er stutt á milli keppna. Ég keppti í Danmörku í byrjun júní en venjulega eru tíu mánuðir í undirbúning fyrir keppni. En ef maður kemst inn á HM hefur maður ekkert val.“

Ekki aftur snúið

Sædís segist strax hafa fundið að þríþrautin ætti vel við sig og tók ástfóstri við íþróttina og ekki síst félagsskapinn sem henni fylgir.

„Ég keppti í mínum fyrsta járnkarli 2019. Svo kom covid svo þetta er í raun fjórða keppnistímabilið mitt,“ sagði Sædís. „Sem krakki var ég í fótbolta og badminton og alltaf hreyft mig mikið en ekkert af viti eins og í þríþrautinni. Ég byrjaði bara í henni því mig langaði í félagsskapinn og hafði gaman að því að hlaupa og hjóla. En eftir að ég kom inn í þetta gat ég ekki hætt og verð í þessu næstu árin.“

Viðsnúningur á sterkustu greininni

Þríþraut er í raun þrjár íþróttir, hlaup, sund og hjólreiðar, og því er undirbúningurinn fyrir keppni því nokkuð snúinn.

„Það er strembið. Þú getur bara tekið 2-3 æfingar í hverri grein í viku þannig að þér finnst ekki eins og framfarirnar séu sérstaklega miklar eins og ef þú værir að hlaupa sex sinnum í viku. Maður þarf að raða þessu rétt upp og þetta er nokkuð flókið,“ sagði Sædís sem kveðst hafa tekið miklum framförum síðasta árið, eða síðan hún fékk sér þjálfara. Og árangurinn hefur ekki látið á sér standa.

„Þjálfarinn minn, Geir Ómarsson, skipuleggur æfingarnar og pælir í þessu öllu saman. Það er mikil kúnst að raða þessu þrennu saman.“

En í hvaða grein er Sædís best?

„Ég hef alltaf verið sterkust í hlaupi en það snerist við á þessu ári og núna er hjólið eiginlega á toppnum. Sundið hefur alltaf verið í 2. sæti og í miðjunni. Hjólið fór úr því að vera mín versta grein í þá bestu og hlaupið úr því að vera sú besta í þá verstu, allavega á þessu tímabili,“ svaraði Sædís.

Margir boltar á lofti

Meðfram þríþrautinni nemur Sædís hugbúnaðarverkfræði við Háskólann í Reykjavík og vinnur sem forritari hjá Origo. Hún heldur því ansi mörgum boltum á lofti í einu, bæði í þríþrautinni og lífinu.

„Yfir sumartímann gengur þetta vel. Þá er ég bara að æfa og vinna og ég er með mikið vinnufrelsi, get unnið hvar sem er og hvenær sem er. En þegar skólinn er í gangi er þetta miklu strembnara. Það sem er erfiðast er að tvinna námið saman við íþróttina. Þetta tvennt saman er ótrúlega mikið og svo þarftu eiginlega að vinna með til að fjármagna þetta. Þetta hefur verið algjört púsluspil síðustu ár,“ sagði Sædís.

Fimm tímarnir

Hún ætlar sér stóra hluti á heimsmeistaramótinu um helgina.

„Ég ætlaði að vera með tímamarkmið um helgina en brautin er ekki jafn flöt og fyrst var gefið til kynna. Hún er meira upp og niður og ég þarf að púsla saman nýrri áætlun. Svo eru ákveðnar stelpur sem ég hef verið að keppa við sem mig langar að vinna. Svo væri mjög gaman að sjá hvar ég stend gagnvart Hjördísi. Ég hef ekki keppt við hana áður en hún er rosalega sterk,“ sagði Sædís.

„Ég fór í fyrsta sinn undir fimm tíma markið í Danmörku og það væri gaman að ná sínum besta tíma eða kringum fimm tímana. Ég veit ekki hversu raunhæft það er að þessu sinni en það væri gaman að reyna við það.“