Vaknaði í morgun sem Lára Zulima Ómarsdóttir

Lára fékk synjun frá Þjóðskrá þegar hún ætlaði að bæta nafninu inn sem millinafni. Málið þurfi því að fara fyrir mannanafnanefnd. 

„Ég hélt að þetta yrði ekkert vesen þar sem þetta er ekki nafn frá 1700 og súrkál. En þegar mannanafnanefnd var sett á laggirnar voru skilin eftir þau nöfn sem fimm eða færri einstaklingar báru,“ segir Lára.

Móðuramma hennar hét Lára Stefanía Zulima Sigfúsdóttir og langömmusystir Láru hét Stefanía Zulima. Hún veit þó ekki hvaðan nafnið kemur.

Kvenkyns Halldór Laxness

„Ég ætlaði alltaf að verða listakona og taka þetta nafn upp sem listamannsnafn en svo varð ég bara aldrei listakona þannig að ég ákvað að bæta því þá við mitt eigið nafn. Ætlaði að vera eins og Halldór Laxness, bara Lára Zulima,“ segir hún og hlær.

Hvernig viltu láta ávarpa þig?

„Ég er alltaf kölluð Lára en ef fólk við aðgreina mig frá öðrum Lárum þá er það voða gaman,“ segir Lára. Lára Zulima virki þá vel.

„Mér hefur alltaf þótt það svo skemmtilegt, áhugavert, skrítið og mystískt nafn.“

Lára efaðist um stund hvort hún væri að taka rétta ákvörðun.

„Þegar ég var að bíða eftir úrskurðinum fór ég í smá stund að efast um að ég væri að gera rétt þar sem ég hef alltaf notað eitt nafn, fjögurra stafa nafn. En þegar niðurstaðan kom í gær fann ég að þetta var rétt ákvörðun,“ segir Lára.

Dóttirin sótti um nafnið Blár

Lára greindi frá tíðindunum á Facebook og uppskar mikil viðbrögð. Hamingjuóskir og spurningar. Ferlið tók um tvær vikur frá því að mannanafnanefnd barst umsóknin þar til nafnið var samþykkt. 

„Ég man hins vegar þegar dóttir mín sótti um að gefa syni sínum nafnið Blár að þá tók það rúman mánuð að fá úrskurðinn. Mögulega þurftu þau þá að skoða það mjög vel (hann heitir Flóki Blár) þar sem það var nýtt nafn en hjá mér fékkst þetta í gegn á hefðarrétti þar sem ekki eru liðin 70 ár frá því amma bar þetta nafn og það var skráð í manntalið 1920,“ sagði Lára í þræðinum við færslu hennar á Facebook. 

Stofnaði fjölmiðlafyrirtækið Zulima

Lára starfaði um árabil sem fréttamaður. Hún vatt kvæði sínu í kross árið 2021 og réð sig sem samskiptastjóra hjá Aztiq, fasteignafélagi í eigu Róberts Wessmann. Hún skrifaði undir starfslokasamning í febrúar.

Hún stofnaði í framhaldinu fjölmiðlafyrirtækið Zulima fyrr á þessu ári þar sem hún tekur að sér fjölbreytt verkefni sem tengjast fjölmiðlum og samskiptum. Lára býr yfir tuttugu ára reynslu sem blaðamaður.