Von á byltingu í Blá­fjöllum í vetur

Einar Bjarna­son, rekstrar­stjóri Blá­fjalla, segir styttast í opnun. Það megi þó gera ráð fyrir það verði ekki fyrr en um miðjan næsta mánuð. Á Face­book-síðu skíða­svæðisins í dag mátti sjá mynd af brekkunum og að þær væru fullar af snjó.

„Þetta var bara sett inn til að æsa að­eins í mann­skapnum. Við erum á fullu að klára nýja snjó­kerfið og erum að vonast til þess að ná að klára það á næstu þremur til fimm vikum. Við erum að horfa á miðjan nóvember sem upp­haf á snjó­fram­leiðslu, ef það verður frost,“ segir Einar og að snjórinn sem nú er tefji meira en hjálpi.

„En það er rosa­lega gott fyrir hjartað. Það er gott fyrir þau sem eiga bágt heima að fá eina mynd af snjó. Manni líður strax betur,“ segir Einar léttur.

Miklar breytingar hafa verið gerðar á skíða­svæðinu undan­farin ár. Síðasta vetur voru reistar tvær nýjar stóla­lyftur og nú er verið að setja upp nýtt snjó­fram­leiðslu­kerfi sem er 100 prósent sjálf­virkt. Kerfið virkar þannig að borað er niður í jörðina og dæla sett ofan í sem dælir ofan í lón. Úr lóninu fer það í dælu­stöð og svo í brekkuna þar sem það fer í gegnum snjó­byssur þar sem vatnið svo frýs í loftinu.

Hægt að skíða um jólin

„Þetta verður bylting fyrir okkur að nýta haust­dagana í nóvember og desember. Að blanda saman fram­leiddum snjó og náttúru­legum snjó. Þá fáum við besta skíða­færi sem völ er á.“

Hann segir að með vélinni þá opnist að hafa meira opið yfir vetrar­tímann og tryggi til dæmis að það verði hægt að komast á skíði fyrir jól.

„Þá geta allir prófað nýju skíðin og brettin annan í jólum. Fólk þarf ekki að lifa við það að það sé alveg snjó­laust. Það er alveg ó­þolandi,“ segir Einar og að síðasti vetur hafi verið alveg skelfi­legur því það hafi rignt svo mikið.

Fólk á þá von á góðu í vetur?

„Já, við erum að vona það. Við þurfum auð­vitað að læra á kerfið í vetur og verðum í námi í haust og inn í veturinn. Svo næsta haust verðum við orðnir pró,“ segir Einar en hann á von á því að það verði haldið upp á það þegar kerfið verður tekið í notkun seinna í haust.