„Ég brýt á mér átta fingur af tíu“

Þeir sem stundað hafa afreksíþróttir á unga aldri hafa sumir reynslu af því að meiðast og finna fyrir verkjum.

Ein þeirra er Þuríður Guðmundsdóttir sem æfði fimleika um árabil. Hún byrjaði að æfa fimleika á leikskólaaldri og æfði áhaldafimleika. Um níu ára aldur fór hún að finna fyrir verkjum í baki en hún æfði þá sex sinnum í viku tvo tíma í senn. Verkirnir fóru versnandi og fóru foreldrar hennar með hana til læknis og í sjúkraþjálfun. 

„Sjúkraþjálfunin hún skilaði einhverjum árangri en ég varð aldrei betri. Ég var alltaf slæm.“

Rætt var við Þuríði í þættinum Hliðarlínunni sem sýndur var Stöð 2 og Stöð 2 Sport í gærkvöldi. Þar sagði hún verkina hafa verið svo slæma að á tímabili hafi hún hafi tekið töluvert af verkjalyfjum líkt og íbúfen og paratabs.

„Ég þurfti að byrja að taka verkjatöflur og þær hjálpuðu mér. Síðan seinnipart grunnskóla þá var þetta bara svona hækjan mín. Þá var ég farin að nota verkjatöflurnar mjög mikið til þess að lina sársaukann.“

Hægt er að sjá brot úr þriðja þætti af Hliðarlínunni  í spilaranum hér fyrir neðan. Þátturinn í heild er á Stöð 2+.

Um tíma hafi hún verið farin að taka verkjalyf daglega.

„Á hverjum degi. Alltaf fyrir æfingar og stundum áður en ég fór að sofa.“

Langvarandi neysla verkjalyfjanna hafði mikil áhrif á hana.

„Til langs tíma þá gerðu þau mjög slæmt og ég fékk til dæmis magasár um fjórtán fimmtán ára sem má tengja bara beint til verkjatöflunotkunar.“

Hún segir foreldra sína ekki hafa vitað af því hversu mikið hún tók af verkjalyfjum.

Þrátt fyrir þráðláta verki hætti Þuríður ekki í fimleikum fyrr en hún slasaðist illa á báðum höndum. 

„Ég lendi í þessu slysi tvítug. Ég brýt á mér átta fingur af tíu og eftir það þá er ég farin að vera svolítið hrædd við stökkin og í fimleikum ef þú ert farinn að vera hræddur þá er mjög erfitt að stunda fimleika.“

Börn geta sjálf keypt lyf 

Samkvæmt upplýsingum frá Lyfjastofnun má hver sem er kaupa lyf. Ekki er kveðið á um nein aldurstakmörk við kaup á lyfjum hvorki í lyfjalögum né reglugerðum. Börnin geta því sjálf farið í apótek og keypt sér lyf. 

Anna Bryndís Blöndal, lektor í lyfjafræði við Háskóla Íslands, segir sífellt fleiri fá magabólgu eða magasár. Hún telur að það megi að hluta rekja til þess að bólgueyðandi lyf fáist í lausasölu og fólk geti því tekið þau án þess að ræða við lækni. 

„Með íbúfenið þá getur það valdið magasári og magablæðingu. Til lengri tíma þá getur það haft áhrif á nýrun. Það hækkar blóðþrýsting. Þannig þessi lyf eru í rauninni fyrst og fremst til að nota í skamman tíma.“

Foreldrar hafa gefið börnum verkjalyf svo þau geti keppt

Þá eru þjálfarar sem segja að stundum sé það að frumkvæði foreldranna að börnin taki verkjalyf til að geta keppt. 

„Ég hef alveg séð foreldri koma með verkjalyf fyrir barn á grunnskólaaldri til að taka svo það klári leikinn,“ segir Díana Guðjónsdóttir þjálfari. 

Það var ekki fyrr en Þuríður hætti í fimleikum og eftir að hún fór til kírópraktors að henni fór loks að líða betur í bakinu. Hún ákvað að læra sjálf að verða kírópraktor og í dag vinnur hún við að hjálpa börnum sem eru í sömu stöðu og hún var. 

Hún segir sjálfsagt að börn taki verkjalyf þegar þau séu með mikla verki. Það sé hins vegar ekki lausn til langs tíma.

„Mér finnst það allt í lagi að taka verkjalyf þegar þess þarf en það á bara að vera einstöku sinnum. Alls ekki í hverri viku.“

Hægt er að sjá brot úr Hliðarlínunni í spilaranum hér fyrir ofan. Þátturinn í heild er á Stöð 2+.