Elvar Örn frá­bær í sigri Melsun­gen og Bjarki Már skil­virkur í sigri Veszprém

Melsungen hefur spilað frábærlega á leiktíðinni og hélt því áfram í kvöld þegar liðið vann sjö marka sigur á Löwen, lokatölur 30-23. Elvar Örn Jónsson skoraði sex mörk og gaf tvær stoðsendingar í liði Melsungen. Arnar Freyr Arnarsson komst ekki á blað. Ýmir Örn Gíslason var ekki í leikmannahóp Löwen að þessu sinni.

Melsungen er í 3. sæti með 16 stig að loknum 11 leikjum. Löwen er í 6. sæti með 11 stig eftir 9 leiki.

Bjarki Már Elísson spilaði aðeins fyrri hálfleik í öruggum sigri Veszprém á heimavelli gegn Budaklasz í efstu deild Ungverjalands í handbolta.

Það eru engar ýkjur að sigurinn hafi verið öruggur en munurinn var 19 mörk þegar flautað var til leiksloka, lokatölur 47-28. Bjarki Már skoraði sex mörk úr aðeins sjö skotum í leiknum. Veszprém er á toppi deildarinnar með fullt hús stiga að loknum níu leikjum.