Páll Óskar og Úlfur Úlfur troða upp til styrktar Palestínu

Í tilkynningu er minnt á að árásir Ísraelshers á Gaza hafi staðið yfir í 39 daga eða síðan hryðjuverkaárásir Hamas á almenna borgara í Ísrael voru þann 7. október.

„Nýjustu tölur herma að 11.320 manns hafa drepist í loftárásum, þar af eru 4650 börn. Þúsundir liggja undir rústum. Meðal aldur þeir sem hafa verið myrt er 5 ára. Ísrael hefur lokað fyrir flutning á vatni, mat, eldsneyti, rafmagni og öðrum nauðsynjum. Læknar framkvæma aðgerðir án verkjalyfja og fyrirburar deyja því Ísrael lokar á nauðsynlegt rafmagn fyrir hitakössum. Af 2.2 milljónum íbúum Gaza eru 1.7 milljón manns á vergangi. Ísrael hefur sprengt spítala, skóla, og flóttamanna búðir. Aldrei hafa fleiri starfsmenn Sameinuðu Þjóðanna né blaðamenn verið drepnir á svona stuttum tíma,“ segir í tilkynningu.

„Það hefur aldrei verið mikilvægara að sýna samstöðu með palestínsku þjóðinni eins og einmitt núna. Við erum rosalega stolt og þakklát fyrir allt þetta frábæra fólk sem búið er að leggja sig fram við að halda þessa flottu tónleika. En nú verður alþjóðasamfélagið að bregðast við, við verðum að segja stopp og setja Ísrael skýr mörk m.a. með viðskiptaþvingunum og slitum á stjórnmálasamstarfi. Við ætlum ekki að taka þátt þjóðernishreinsunum. Vopnahlé tafarlaust og lifi frjáls Palestína!“ segir Magnús Magnússon, stjórnarmeðlimur í Félaginu Ísland-Palestína.

Félagið Ísland-Palestína biður íslenska ríkið um að beita sér af öllu afli til að koma á tafarlausu vopnahléi, með því að slíta stjórnmálasambandi við Ísrael og með viðskiptaþvingunum þangað til að Ísrael hættir þjóðernishreinsunum á Palestínu og allir íbúar beggja þjóða búa við sömu réttindi.

„Maður er eiginlega orðlaus yfir hryllingnum sem á sér stað í Palestínu undanfarnar vikur og auðvelt að finna til vanmáttar – sérstaklega hér á litlu, öruggu eyjunni okkar. Við skipuleggjendurnir erum öll í tónlist á einn hátt eða annan, annað hvort tónlistarfólk sjálf eða bransa megin og vildum finna leið til þess að hjálpa á þann hátt sem við kunnum. Hugmyndin er að sýna að tónlistarbransanum á Íslandi stendur ekki á sama og vilja styðja við baráttu Palestínumanna fyrir friði og mannsæmandi lífi auk þess að safna peningum í neyðarhjálp sem sár þörf er á. Við hvetjum öll sem vettlingi geta valdið að mæta í Gamla bíó og styðja við góðan málstað. Í staðinn lofum við kröftugum tónleikum með nokkru af helstu tónlistarfólki landsins,“ segir Árni Þór Árnason, einn af skipuleggjendum tónleikanna.

Félagið Ísland-Palestína segist hafa alltaf átt gott samband við listamenn og tónlistarfólk á íslandi sem stutt hafa málstað Palestínu. 

„Gegnum tíðina höfum við getað kallað á okkar besta fólk til að halda stóra styrktartónleika og hefur peningurinn farið í margvísleg góð málefni, þar má nefna Palestinian Children’s Relief Fund (PCRF) hjálparsamtökin á Gaza, góðgerða samtakanna Aisha á Gaza, kaupum á gervifótum fyrir gervilimastöðina á Gaza. Strax og loftárásir Ísraels her hófust á Gaza voru margir listamenn sem höfðu samband við FÍP og vildu leggja sitt af mörkum með því að skipuleggja styrktartónleika. Á fyrri tónleikum félagsins hafa JóiPé og Króli, Mammút, Hildur, Sóley, Hórmónar, KK, Gus Gus, Mugison, Quarashi, Mammút, Ensími og fleiri lagt baráttunni lið.

Miðinn á tónleikana annað kvöld kostar 2500 og fer miðasala fram á Tix og í hurðinni. Varningur til styrktar Palestínu verður til sölu á tónleikunum, s.s. bolir, taupokar og Keffiyeh treflar.

Allir sem koma að tónleikunum, hvort heldur sem er tónlistarmenn, tæknimenn, skipuleggjendur, o.s.frv. gefa vinnu sína þetta kvöld.

Allur ágóði af tónleikunum rennur til:

Aisha, góðgerðarsamtök á Gaza-svæðinu fyrir konur og börn

PCRF, Palestinian Children’s Relief Fund, hjálparsamtök á Gaza sem veita börnum heilbrigðisaðstoð.

Dagskrá

Kynnir: Þuríður Blær

19:00 – Húsið opnar

19:45 – Stuttmynd frá Amnesty International um aðskilnaðarstefnu Ísraels

20:00 – Tónleikadagskrá hefst

Góðgerðarhlaðborð að Hallveigarstöðum

Þá bjóða Anna Kristín B. Jóhannesdóttir, Sameer Sameer og Eyrún Ólöf til palestínsks kvöldverðar til styrktar þeim sem eiga um sárt að binda á Gaza.

Hópur palestínsks fólks ætlar að halda upp á ríka matarhefð og menningu sína í skugga innrásar Ísraela á Gaza. Boðið verður upp á hlaðborð kjöt- og grænmetisrétta, allir ættu að finna eitthvað við sitt hæfi. Ekki er hægt að panta fyrirfram heldur verður fyrstur kemur fyrstur fær.

Allur ágóði mun renna milliliðalaust í neyðaraðstoð á Gaza. Öll sem vilja sýna Palestínumönnum á Íslandi og Gaza samstöðu eru hjartanlega velkomin. Frjáls framlög en mælt er með 2500kr.

Við erum komin með reikning sem hægt er að leggja inn á:

• Rkn: 0133-26-020574
• Kt: 510219-1550
• Útskýring: Gaza