Eftir ágætis byrjun og að hafa komist yfir á 17. mínútu var frammistaðan ekki upp á marga fiska og úr varð að Slóvakía vann 4-2 og tryggðu sig þar með inn á EM 2024. Orri Steinn Óskarsson komst best frá sínum leik af íslensku leikmönnunum.

Elías Rafn Ólafsson, markvörður: 3

Fékk á sig þrjú mörk úr 1 væntu marki úr opnum leik. Var með hendi á vítinu en laus úlnliður var vandamálið og sama vandamál var í fjórða markinu. Erfitt kvöld fyrir Elías og líkur á því að annar markvörður fái tækifæri á sunnudaginn.

Alfons Sampsted, hægri bakvörður: 4

Mörkin komu frá hans væng en hann og Guðlaugur litu því miður mjög illa út í kvöld.

Sverrir Ingi Ingason, miðvörður: 4

Tók þátt í búa til bras í varnarleik íslenska liðsins og kom til dæmis Kolbeini marg oft í bölvað bras með erfiðum sendingum

Guðlaugur Victor Pálsson, miðvörður: 4

Þetta byrjaði svo vel fyrir Guðlaug. Geggjuð sending á pönnuna á Orra í marki íslenska liðsins. Svo lá leiðin norður og niður. Í þremur af fjórum mörkum heimamanna var hægt að horfa til hans. Var t.a.m. saltaður í þriðja markinu.

Kolbeinn Birgir Finnsson, vinstri bakvörður: 4

Mjög sterkur í byrjun í vörn og sókn. Var oft á tíðum komið í klandur með sendingum frá miðvörðunum sem hann spilaði við hlið í kvöld. 

Jóhann Berg Guðmundsson, miðjumaður: 4

Gerði mjög lítið á miðjunni í dag. Gaf þó stoðsendingu í seinna marki Íslendinga en okkur vantaði mikið meira frá fyrirliðanum í dag.

Arnór Ingvi Traustason, miðjumaður: 5

Fór meiddur út af á 25. mínútu en hafði verið partur af mjög þéttri liðsheild íslenska liðsins. Fékk kannski ekki næg tækifæri til að skína að fullu.

Kristian Hlynsson, miðjumaður: 4

Átti fínar glefsur í upphafi eins og kannski fleiri. Ósanngjarnt að það hafi verið dæmt víti á hann en annars var lítið að frétta úr hans fyrsta landsleik.

Willum Þór Willumsson, hægri kantur: 4

Fékk fá tækifæri til að láta ljós sitt skína í dag.

Arnór Sigurðsson, vinstri kantur: 4

Sást ekkert þær 60 mínútur sem hann náði að spila. Ekki var honum hjálpað enda voru flestar sendingar til baka.

Orri Steinn Óskarsson, framherji: 6

Komst langbest frá þessum leik en eftir að hafa verið duglegur í pressu á fyrstu mínútum leiksins, skora magnað skallamark til að koma okkur yfir þá datt botninn úr hans leik eins og alls íslenska liðsins. Því miður fékk hann engin tækifæri til bæta við.

Varamenn

Stefán Teitur Þórðarson- Kom inn fyrir Arnór Ingva Traustason á 25. mínútu: 4

Eða kom hann inn á? Sást lítið allavega.

Ísak Bergmann Jóhannesson- Kom inn fyrir Kristian Hlynsson á 46. mínútu: 4

Ekki mikið úr hans leik að segja frá. Sömu spurningu má spyrja sig eins og Stefán Teit.

Aron Einar Gunnarsson - Kom inn fyrir Arnór Sigurðsson á 61. mínútu: 5

Það komst ró á leik liðsins þegar hann kom inn á og pínu barátta. Lýsir atvgervi liðsins þegar maður sem spilar ekki leiki fyrir félagslið er með bestu mönnum liðsins.

Andri Lucas - Kom inn fyrir Orra Stein Óskarsson á 72. mínútu

Spilaði of lítið til að fá einkunn. Skoraði seinna mark Íslands.

Alfreð Finnbogason - Kom inn fyrir Willum Þór Willumsson 72. mínútu

Spilaði of lítið til að fá einkunn.