Tískutal er fastur liður á Vísi þar sem rætt er við ólíka einstaklinga um þeirra persónulega stíl og hvernig tíska nýtist þeim í daglegu lífi. Klæðaburður er sannarlega fjölbreytt listform en við fáum að skyggnast inn í ólíka fataskápa og fræðast nánar um það merkilega tjáningarform sem tíska er fyrir hverjum og einum viðmælanda.
Hvað finnst þér skemmtilegast við tískuna?
Mér finnst skemmtilegast hvernig tískan tjáir samtíma okkar og er einskonar spegill á hann.
Mér finnst gaman hvernig allir hafa frelsi til að tjá sig ólíkt með klæðaburði og hvernig tískan endurspeglar okkur sem manneskjur í öllum okkar margbreytileika.
Það er líka mikil sköpunargleði í tískunni. Við getum haft áhrif á fólk í kringum okkur með henni, veitt innblástur og glatt fólk með því hvernig við klæðum okkur. Þetta er eins konar samtal sem er ótúlega gaman að taka þátt í.
Hver er uppáhalds flíkin þín og af hverju?
Núna er það bleika Charlotte Simone kápan mín af því að hún nýjust og er yndislega falleg.
Ég held líka mikið upp á Comme Des Garçons rósótta jakkann minn. Hann er svo skemmtilegur í sniðinu og er algjört listaverk. Þegar maður á vandaða og flotta hönnun þá fær maður ekki leið á flíkinni þótt hún sé gömul.
Flíkin stendur sterk og fylgir ekki einhverjum ákveðnum tískustraumum. Ég dreg jakkann upp aftur og aftur og nota mikið.
Eyðirðu miklum tíma í að velja föt hverju sinni?
Í rauninni ekki, því ég er alltaf á síðustu stundu.
Ég spái meira í því ef það er eitthvað sérstakt tilefni. Þá finnst mér gaman að eyða tíma í að hugsa um það og undirbúa klæðaburðinn með fyrirvara.
Nýturðu þess alltaf að klæða þig upp?
Já, ég elska að klæða mig upp og hef mikla ánægju af því. En mér finnst líka mjög frelsandi að losna undan sjálfri mér stundum.
Mér finnst ekkert betra en að klæðast búningi karakters sem ég er að leika, setja mig í spor hans og fá frí frá sjálfri mér á meðan.
Hvernig myndirðu lýsa stílnum þínum?
Ég myndi lýsa stílnum mínum sem kvenlegum, lífsglöðum, litríkum, rómantískum og ævintýragjörnum.
Hefur stíllinn þinn breyst mikið í gegnum tíðina og hvernig þá?
Ég held ég sé bara farin að sitja betur í sjálfri mér. Ég veit meira hver ég er og hvað ég fíla.
Áður fyrr lenti ég stundum í því að klæðast einhverju og líða síðan ekki nógu vel í því en það gerist mjög sjaldan í dag. Ég reyni einnig að kaupa færra og vandaðra í dag en ég gerði áður fyrr.
Hvaðan sækirðu innblástur í tískunni?
Ég sæki innblástur í tískuna aðallega í gegnum áhugavert fólk í kringum mig, listamenn og fólk sem ég lít upp til. Ég finn líka innblástur í kvikmyndum, tískublöðum og á veraldarvefnum.
Ertu með einhver boð og bönn þegar það kemur að klæðaburði?
Í rauninni ekki. Mér finnst allt mega ef maður tengir við það og líður vel í því.
Hver er eftirminnilegasta flík sem þú hefur klæðst og af hverju?
Það sem mér dettur í hug er kjóllinn sem ég klæddist á frumsýningu kvikmyndarinnar Ölmu sem ég fór með aðalhlutverkið í. Sól Hansdóttir hannaði flíkina en hún er mögnuð listakona.
Hönnuðurinn Sól Hansdóttir var viðmælandi í Vísisþáttunum Kúnst en hægt er að horfa á hann hér:
Býrðu yfir einhverju góðu ráði þegar það kemur að tísku?
Að vera maður sjálfur, þora að taka áhættu og hafa gaman af!
Hér má fylgjast með Snæfríði Ingvars á samfélagsmiðlinum Instagram.
