Af­hjúpa leyndar­dóm höfuðskeljarinnar í Ráð­herra­bú­staðnum

Iðnaðarmenn sem unnu við framkvæmdir í risi ráðherrabústaðarins fundu höfuðkúpuna undir gólffjölum í risi bústaðarins. Fram hefur komið að hauskúpan sé líklegast af smávaxinni konu.

Katrín Jakobsdóttir forsætisráðherra kannaði hjá Íslenskri erfðagreiningu hvort unnt væri að rannsaka uppruna beinanna með erfðagreiningu. Mannerfðafræðingarnir Agnar Helgason og Sunna Ebenesersdóttir munu gera forsætisráðherra grein fyrir rannsókninni og niðurstöðum hennar í Ráðherrabústaðnum á morgun klukkan 13.

Vísir stefnir á að sýna beint frá kynningu á niðurstöðunum á morgun.

Ekki eru vísbendingar um að smávaxnakonan hafi hlotið áverka í lifanda lífi. Margt bendir hins vegar til þess að ekki hafi alltaf verið farið vel með beinin eftir andlát hennar, hvenær sem það var.

„Við vitum að höfuðkúpur voru notaðar sem öskubakkar og við erum með hér í okkar safnkosti höfuðkúpur sem voru notaðar sem öskubakkar,“ sagði Ágústa Kristófersdóttir, framkvæmdastjóri safneignar Þjóðminjasafnsins, í samtali við fréttastofu í september.

Þannig að það er allavega ein kenning sem væri alveg raunhæfur möguleiki?

„Já, og það væri hægt í framhaldinu að skoða það.“

Þá eru sérfræðingar engu nær um hvernig beinin rötuðu í Ráðherrabústaðinn.

„Það er augljóst að einhver hefur sett þetta þarna, þetta er ekki eitthvað sem tapast milli gólffjala. Væntanlega hefur þetta verið sett þarna niður, lokað fyrir og ákveðið að þessi bein ættu að fá að hvíla þarna,“ sagði Ágústa.

„Þetta er náttúrulega eins og upphafið að glæpasögu og það átta sig allir á því, jafnvel kaldrifjaðir vísindamenn.“