Ein nei­kvæð at­huga­semd snerti streng hjá Júlíönu Söru

Þeir Benedikt Valsson og Fannar Sveinsson voru leikstjórar Áramótaskaupsins í ár. Handritshöfundar skaupsins voru þau Þorsteinn Guðmundsson, sem gerði garðinn frægan með Fóstbræðrum, Sverrir Þór Sverrisson, betur þekktur sem Sveppi, Júlíana Sara Gunnarsdóttir og Vala Kristín Eiríksdóttir sem mynduðu gríntvíeykið Þær Tvær auk Karenar Bjargar Þorsteinsdóttur, sem er ein af höfundum grínseríunnar Venjulegt fólk ásamt þeim Júlíönu Söru, Völu Kristínu og Fannari.

Sindri ræddi við þau Fannar, Benna og Júlíönu í Íslandi í dag í gær.

„Mér finnst gaman að þegar ég skrolla í gegnum kommentakerfið, af því að við sjáum hvað þið segið, að ég er komin með breiðara bak. Þetta tók ekki mikið á mig að sjá neikvæð komment. Nema þegar ég sá frá Rikka, hann kom með mjög neikvætt komment og ég móðgaðist smá þá. Fyrrverandi vinur minn, við erum ekki vinir í dag,“ segir Júlíana Sara og hlær.

Vísaði Júlíana þar til Ríkharðs Óskars Guðnasonar, Rikka Gje, sem urðaði yfir Skaupið á Twitter og sagði það versta sjónvarpsefni ársins.

„Við erum sátt, við sem skrifuðum það og unnum að því,“ segir Fannar Sveinsson en hans uppáhaldsatriði í Skaupinu var Fóstbræðraatriðið svokallaða á leikskólanum sem margir tóku sennilega eftir.

Hér að neðan má sjá brot úr innslagi gærkvöldsins en áskrifendur geta séð það í heild sinni á Stöð 2+ og í frelsiskerfi Stöðvar 2.