Um­boðs­maður Dragusins stein­hissa að hann hafi valið Tottenham fram yfir Bayern

Spurs er nálægt því að ganga frá kaupunum á Dragusin frá Genoa fyrir 25 milljónir punda.

Bayern hafði einnig áhuga á rúmenska miðverðinum og freistaði þess að kaupa hann en svo virðist sem hann hafi valið Tottenham fram yfir þýsku meistarana. Það kom umboðsmanni Dragusins, Florin Manea, á óvart.

„Við trúum því ekki að hann hafi hafnað Bayern. Radu hafði gefið Spurs loforð og ákvað að efna það. Við erum samt undrandi á þessu,“ sagði Manea.

Dragusin er á sínu öðru tímabili með Genoa. Hann kom fyrst til félagsins á láni frá Juventus fyrir síðasta tímabil en Genoa gekk svo frá endanlegum kaupum á honum í janúar í fyrra.